Американската Национална воздушно-вселенска администрација – НАСА ја претстави 3-Д печатената просторија од 160 метри квадратни во американската сојузна држава Тексас, каде што група луѓе ќе ги тестираат и ќе се подготвуваат за „вистинските предизвици“ на идните мисии на Марс.
– Ова е од клучно значење за тестирање решенија кои ги задоволуваат сложените потреби на животот на површината на Марс. Симулациите на Земјата ќе ни помогнат да ги разбереме и одговориме физичките и менталните предизвици со кои ќе се соочат астронаутите, пред тие да заминат – појасни Грејс Даглас, предводничка во научните истражувања на НАСА за напредна технологија за храна.
Затворениот протор се наоѓа во Вселенскиот центар „Џонсон“ во Хјустон, САД. Тука, четворица доброволци, членови на екипажот, ќе почнат со подготвки за „мисија на Марс“, налето, преку копнена симулација, помагајќи ѝ така на НАСА да се подготви за истражување со луѓе на Марс.
Така, првата ваква мисија треба да почне во јуни. За време на симулацијата, четворицата луѓе ќе живеат и работат во 3Д-печатен „ИКОН“ модул што вклучува две бањи, вертикална фарма за зелена салата, соба за медицинска нега, простор за релаксација и неколку работни станици. Доброволците ќе спроведат различни активности типични за една вселенска мисија, меѓу кои и симулирани вселенски излегувања или т.н. „марсовски прошетки“ (Marswalks), натаму – роботски операции, одржување на живеалиштето, лична хигиена, телесни вежби и одгледување на културите за исхрана.
