Техно
Првиот траект со погон на водород е вклучен во операциите на компанијата „Норлед“. Норвешката поморска управа издаде лиценца за траектот „МФ Хидра“, кој по долгорочен развој и тестирање конечно може да плови. Траектот сега ќе превезува патници меѓу Хјелмеланд и Несвик без емисија на гасови. Долг е 82,4 метри и може да прими до 300 патници и 80 возила, а годишно ја намалува емисијата на јаглерод за 95 отсто. Беше испорачан во 2021 година и може да достигне брзина од девет јазли благодарение на две горивни ќелии од 200 киловати, два генератора од 440 киловати и два погонувача на Шотел. Опремен е со резервоар за складирање водород со волумен од 80 метри кубни.
„Норлед“ го тестираше системот од почетокот на годинава, а во изминатите неколку месеци ги доби сите дозволи. Ќе плови по триаголен пат помеѓу Хјелмеланд, Скипавик и Несвик.
Компанијата соработуваше со странски партнери за развојот на траектот. Водородните системи ги снабдуваше германската компанија „Линде инженеринг“, а „Дејн Балард“ изуми горивни ќелии што користат водород за производство на енергија. Батериите ги обезбеди компанијата „Корвус енерџи“.
Во моментов, само „Норлед“ и вселенската индустрија користат течен водород како гориво, така што траектот „МФ Хидра“ претставува значителен технолошки напредок во поморскиот сектор. Исто така, тоа е голем пресврт за компанијата „Норлед“ и за Норвешка бидејќи е доказ дека технологијата функционира, како и дека соработката меѓу Владата и деловните субјекти во областа на напредната технологија носи предности.
