Поранешниот американски претседател и можен републикански претседателски кандидат Доналд Трамп им вети на своите гласачи дека ќе стави крај на војната во Украина во рок од 24 часа, доколку биде реизбран.
Трамп рече дека рускиот претседател Владимир Путин почнал да распоредува војници на границата со Украина по „катастрофата“ со неговото „исфрлање од Белата куќа“, пренесува „Кликс“.
Тој ја обвини администрацијата на претседателот Џо Бајден дека не се ни обидела да преговара со Путин.
– Не е случајно што „длабоката држава“ уште повеќе ме прогонува откако ветив дека ќе ја завршам војната во Украина – рече Трамп.
Тој додаде дека би можел да ја заврши војната „многу брзо“ откако ќе биде избран за претседател.
– Ќе имам договор во рок од 24 часа. Стоејќи пред вас денес, јас сум единствениот кандидат кој го даде тоа ветување. Ќе застанам на патот на Третата светска војна кон која одиме – рече Трамп.
Украинскиот претседател, Володимир Зеленски, ноќеска изјави дека завршувањето на војната во Украина веќе оваа година е заедничка задача на цивилизираниот свет.
Зеленски во редовното ноќно видео обраќање до сонародниците кажа дека сега е многу важно секој што има влијание врз информациите да учествува во информативната работа, пренесе украинската агенција Униан.
Украинскот претседател кажа дека тоа не важи само за новинарите, туку за „сите што можат да ја шират вистината за агресијата“, односно кои можат „да го потсетат светот на украинските мажи и жени кои поминале низ окупацијата, низ загубите“.
