Може да изгледа необјасниво, но мене ми е јасно. Нема играчи од светска класа во тимот, така што на секој натпревар мораме да се бориме. Таа политика не е променета. Тоа е менталитетот на клубот. Тоа е како семејство. Имаме група што е само за тимот, вели Пефок, центарфор на Унион Берлин и репрезентативец на САД
ФУДБАЛ
Февруари е и Џордан Пефок седи на клупата на Унион Берлин додека стартните 11 ќе излезат за мечот со Шалке дома, во меч од фудбалската германска Бундеслига. Вообичаено, замените би биле разочарани што ќе бидат на клупата, но таму е напаѓачот и страсно ја пее клупската химна пред натпреварот, пишува „Скај спорт“.
– Ја научив песната. Одев на часови по германски јазик и некои од моите соиграчи ми помогнаа да ги научам фразите. Тоа покажува дека добро се забавувам, па дури и ми користи пеејќи заедно. Овие навивачи се извонредни, тие не се засегнати од резултатите и тоа многу помага. Можете да победите и да одите нагоре на табелата, но тие секогаш поддржуваат и притискаат и навистина го сакаат тимот – изјави тој за „Скај спорт“.
Тој момент ја симболизира врската помеѓу гледачите и тимот на овој специјален клуб, кој речиси згасна пред околу 20 години, но од редовен член на Втората лига до 2019 година стана етаблиран европски тим и тим во трка за титулата во Бундеслигата во период од четири сезони.
Скромниот клуб со стадион со 22.000 седишта во градското предградие Копеник го привлекува целото внимание. Клубот со трети најниски плати во дивизијата се заканува да го растури триумвиратот на Баерн, Борусија Дортмунд и Лајпциг, а Унион Берлин освои 10 бода од четирите меча со тие тимови сезонава. И во почетокот на минатиот месец, Унион беше неочекуван лидер во Бундеслигата. Оттогаш, нивната форма во лигата опадна и тие по 24 кола се на четвртото место, но победата над Ајакс во плејофот за Лига Европа ги потсети сите колку е посебен овој клуб, пишува „Скај спорт“.
Па, како успеа сето ова?
– Може да изгледа необјасниво, но мене ми е јасно. Нема играчи од светска класа во тимот, така што секој натпревар и викенд мораме да се бориме. Таа политика не е променета. Тоа е менталитетот на клубот. Тоа е како семејство. Имаме група што е само за тимот. Немаме никој во тимот или во персоналот, кој е арогантен. Поголемиот дел од тимовите што доаѓаат овде велат дека им е тешко да играат овде со поддршката и атмосферата што ја имаме, тоа го прави посложено играњето против нас – вели Пефок, репрезентативец на САД.
Она што е збунувачки во моментната состојба е што иако нивната форма е прогресивна, нивниот стил е прагматичен, пишува „Скај спорт“. Клубот од Берлин е на местата за пласман во Лигата на шампионите и покрај тоа што има создадено најмалку шанси во лигата, со најмалку шутеви во дивизијата и има трет најмал посед на топката, но само Баерн и Лајпциг примија повеќе шутеви во Бундеслигата сезонава.
– Нашиот стил е одбранбен. Ние не сме тим како Лајпциг и Баерн, кои секогаш ја држат топката. Ние сме тим што мора да се бори долго време на теренот, но потоа имаме многу играчи што можат да казнуваат тимови и да постигнуваат голови. Нашите напаѓачи имаат многу индивидуални тренинзи, бидејќи се браниме многу повеќе во споредба со другите напаѓачи во лигата. Само треба да го направиме тоа заедно – вели Пефок.
За да го имплементира ова, Унион Берлин има двајца мозоци на чело, тренерот Урс Фишер и спортскиот директор Оливер Ранхерт. Претходното искуство на вториот како скаут го направи остроумен набљудувач на таленти, кои обично поминуваат под радарот, и многу тесно соработуваше со Фишер откако почнаа да работат заедно во 2019 година, пишува „Скај спорт“. Во претходните две сезони, Унион потпиша договор со 32 играчи, половина од нив беа или бесплатни трансфери или договори за заем и ниту едно од потпишувањето не чини повеќе од 10 милиони евра.
– Ангажирањето е многу специфично. Клубот знае што сака и што му треба, а новите играчи брзо се приспособија – вели Пефок.
А потоа, тука е главниот тренер Фишер, кој има развиено тренерска репутација на тивок и брилијантен. Медиумите го гледаат како мирна фигура на прес-конференциите, кој никогаш не го крева гласот. Пефок вели дека тоа им го пренесува и на играчите.
– Тој е многу страстен на теренот, се труди да ги предаде својот интензитет, решителност, неговиот начин на игра и секогаш се труди да нѐ турка. Надвор од теренот тој е посмирен – рече Пефок.
Целата оваа култура, гледачи, стручниот штаб, клупската хиерархија, играчи, создаде скромен клуб што знае дека патот надолу може да биде брз како и патувањето нагоре, пишува „Скај спорт“. Толку многу што идејата за освојување доволно бодови за да опстане уште се дискутира и покрај тоа што тимот е на четвртото место на табелата.
– Целта во почетокот на сезоната беше да опстанеме. Во минатото сте виделе клубови како се појавуваат, играат добро две или три години и ги изненадуваат луѓето, а потоа се враќаат надолу. Ова е втора сезона што овој клуб игра во Европа, следната сезона изгледа сигурно дека повторно ќе бидеме во Европа. Сега, разговорите со тренерот и со претседателот се дека на крајот на сезоната ќе да бидеме таму каде што заслужуваме, без разлика дали тоа е Лига на шампионите, Лига Европа или Конференциска лига. Целта сезонава беше опстанок. Така може да биде и во следната сезона – вели Пефок. Н.М.
