Актерите Риз Ахмед и Алисон Вилијамс, денеска, во театарот „Семјуел Голдвин“ во Калифорнија ги објавија имињата на номинираните во 23 категории. Годинашното 95-то доделување на „оскарите“ ќе се одржи на 12 март во театарот „Долби“ во Лос Анџелес, а водител, по неколку години, повторно ќе биде комичарот Џими Кимел.
Научнофантастичниот филм „Сè секаде одеднаш“ со 11 номинации е предводник на листата. Зад него се „Тажачките од Инишерин“ и „На Западот ништо ново“, кои имаат по девет. За најдобар филм оваа година номинирани се „Тажачките од Инишерин“, „На Западот ништо ново“, „Аватар: Патот на водата“, „Елвис“, „Фабелманови“, „Тар“, „Топ ган: Маверик“, „Триаголник на тагата“ и „Жените зборуваат“. За „оскар“ за најдобар странски филм ќе се борат „На Западот ништо ново“ (Германија), „Аргентина, 1985“ (Аргентина), „Блиску“ (Белгија), „Тивката девојка“ (Ирска) и „ЕО“ (Полска). Мартин Мекдона за „Тажачките од Инишерин“, Даниел Кван за „Сè секаде одеднаш“, Стивен Спилберг за „Фабелманови“, Тод Филд за „Тар“ и Рубен Естлунд за „Триаголник на тагата“ се номинирани во категоријата најдобар режисер.
