Турција ги продолжува преговорите со Русија и Украина
Турција ги продолжува разговорите со Русија и Украина за ставање крај на војната, изјави денеска турскиот претседател Реџеп Тајип Ердоган, јавува Анадолија.
– Преку договорите за транспорт на жито и размена на заробеници меѓу Русија и Украина, гледаме дека е можно да се трасира патот кон мирот доколку и се даде шанса на дипломатијата, рече Ердоган на трипартитниот самит на Турција, Азербејџан и Туркменистан.
Тој посочи дека во оваа насока продолжуваат разговорите со претседателите на Русија и Украина Владимир Путин и Володимир Зеленски.
– Се надеваме дека прво ќе постигнеме прекин на огнот, а потоа и траен мир во нашиот регион, рече Ердоган.
Во градот Аваза, во западен Туркменистан, денеска се одржа средба на Ердоган, азербејџанскиот претседател Илхам Алиев и туркменскиот лидер Сердар Бердимухамедов, на која разговораа за чекорите за понатамошно подобрување на соработката меѓу трите земји во различни области, особено трговијата, енергијата и транспортот.
Претседателот на Турција рече дека треба да се започнат активности за транспорт на гас од Туркменистан до западните пазари.
– Подготвени сме да работиме на пренос на електрична енергија од Туркменистан и Азербејџан до нашата земја, рече Ердоган.
Тој додаде дека полноправното членство на Туркменистан во Организацијата на турските држави ќе ја зајакне групата. Од 2021 година Туркменистан има статус на набљудувач во оваа организација.
Кремљ: Нема предлози за новогодишно примирје во Украина
Кремљ денеска соопшти дека не добил никакви предлози од Киев за запирање на борбите во Украина за време на претстојниот празничен период и дека прекин на огнот не бил на агендата на Москва.
– Не, од никого не се примени никакви предлози и ниту една тема од ваков вид не е на дневен ред – изјави портпаролот на Кремљ, Дмитриј Песков, како одговор на прашањето дали Русија ќе ги паузира нападите за Божиќ или за Нова година.
