Продолжуваме онаму каде што застанавме. Рековме дека сето она кое што ќе се случува деновите кои што се пред нас во Парламентот преставува обична фарса, суштината е во оваа зграда овдека. А, суштината е дека тие што се во оваа зграда овдека веќе се сложиле на тоа кое што го нарекуваат модифициран последен предлог, а во суштина е ништо повеќе отколку директен удар врз македонскиот идентитет. Тоа се луѓето кои што ќе останат запаметени во македонската историја како луѓе кои што го распродаваа идентитетот македонски за да ги зачуваат своите фотелји уште неколку месеци, изјави Христијан Мицкоски, лидер на ВМРО-ДПМНЕ.
Она што ќе се случува овие два дена во рамките на Парламентот, вели тој, е обична фарса бидејќи само 41 глас се доволни за да т.н. заклучоци или тој лист хартија да бидат усвоени.
-Јас навистина не знам што друго да кажам освен тоа дека треба да кажат НЕ во последен момент. Претпоставувам дека барем малку има македонско во нив и ако има барем малку македонско во нив тогаш ќе кажат НЕ. Бидејќи ќе повторам уште еднашка, ова што се нуди не е почеток на преговори за Македонија. Ова што се нуди е сликање во Брисел, за да ги отпочнеме преговорите потребно е да биде променет Уставот, а ние како ВМРО-ДПМНЕ јасно и гласно кажавме дека Уставот нема да се промени и покрај шпекулациите на одредени слуги и платеници на власта дека постоеле вакви, постоеле такви структури во парламентот. Еве јас најодговорно ви тврдам дека ВМРО-ДПМНЕ нема да гласа за измените на Уставот, а нема да гласа мислам ниту пратениците од СДСМ откако ќе го видат Протоколот кој ќе го потпише Бујар Османи. Затоа што тој е толку лош, што мислам дека дури некои од тие или пак можеби сум преголем оптимист па не знам што да кажам, но дури се уште верувам дека кај некои од пратениците од СДСМ постои малку македонско затоа што кога ќе го прочитаат предлогот односно протоколот којшто ќе го потпише Бујар Османи ќе се предомислат и ќе се проколнуваат самите себеси затоа што и воопшто дозволиле да гласаат за ова што се нарекува последен модифициран предлог. Така што ете тоа е она кое нас не чека во деновите коишто следат, бидете спокојни. Апел до македонската јавност дека можеби ова на сила ќе им помине во Парламентот и можеби ќе има кушкачи чија што единствена цел е да направат директен пробој во македонскиот идентитет. Ќе измислуваат дека имало пратеници, вакви или такви коишто се подготвени за Уставни измени, но јас ве уверувам дека такви Уставни измени ВМРО-ДПМНЕ, а и поголем дел од пратениците од Парламентот нема да поддржат – вели Мицкоски.
Вели дека на претседателката на Европската комисија, Урсула фон дер Лајен, која утре ќе има средби со државниот врв и ќе се обрати во Парламентот ќе и каже дека ова е Македонија, ова е македонски народ со своја традиција, дека ова е македонски народ кој со векови се борел за своја сопствена држава, има своја култура која што е со векови, кој говори македонски јазик и е горд затоа што говори македонски јазик и е горд затоа што е македонски народ кој живее во својата Македонија.
За тоа доколку биде прифатен францускиот предлог Мицкоски вели:
-Јас ви реков дека оваа Влада што е сместена во оваа зграда веќе го прифатила овој модифициран предлог затоа што едноставно луѓето не се грижат за македонскиот идентитет туку се грижат за својата политичка кариера, за фотелјите, за привилегиите. Станува збор за корумпирана политичка елита, но тоа ќе трае кратко.
