Триесетгодишниот македонски турист што денеска стапна на копно откако спасувачките екипи го пронајдоа југозападно од Касандра, на Халкидики, по поминати преку 17 часа во морето, кажа дека спасувањето е најголемиот подарок за неговиот роденден, пред да биде пренесен во болница. Неговиот татко и брат му се фрлија во прегратки видно олеснети што сагата е завршена, а нивниот најдраг е жив, пишува грчкиот весник „Прототема“.
Како што ѝ рекол на градоначалничката на Касандра, Анастасија Чалкиа, која од првиот момент беше на местото на настанот и го придружуваше до Здравствениот дом, тој успеал да преживее бидејќи пронашол топка што ветерот ја донел во морето, ја фатил и се држел за неа додека бродот не го забележал.
– Многу сме среќни поради среќниот крај. Момчето е во добра здравствена состојба, прилично дехидрирано, но е добро. Пред малку ми кажа дека успеал да преживее благодарение на топката што ја нашол во морето. Успеал да ја држи топката цели 19 часа. Тој е многу силно дете и е во добра форма, паметен и одлично се справуваше со себе – изјави Чалкиа за „Прототема“.
Младиот човек е многу среќен што успеал повторно да стапне на копно и се чини дека е во добра здравствена состојба и покрај неговата голгота. Тој, всушност, побарал од градоначалникот на Касандра да направат заедничка фотографија.
Во исто време продолжува потрагата по третото момче од Македонија кое од вчера попладне се води како исчезнато во морската област во Посеиди на Халкидики.
Од раните утрински часови на местото повторно се обиде да го лоцира хеликоптер на воздухопловните сили кој пред кратко време ја заврши истрагата, а упорно во моментов го бараат два брода на крајбрежната стража и пет приватни.
Се започнало кога тројца Македонци за време на роденденска забава на плажа вчера доцна попладне решиле да се нурнат во морето. Но, силниот ветер како и морските струи ги повлекле тројцата млади луѓе, така што тие не можеле да излезат на брегот и биле изгубени од видик од копно. Еден од тројцата членови на групата, на возраст од 25 години, уште вчера беше пронајден од брод и е безбеден, додека вториот беше лоциран денес, а по третиот се уште се трага.
Некои од капачите на плажата сфатиле што се случило, но сето тоа се одвивало во неколку секунди и немале време да реагираат. Веднаш ги известиле надлежните и алармот бил вклучен за лоцирање на тројцата млади момчиња, пишува „Прототема“. Под координација на Единствениот координативен центар за пребарување и спасување, на местото на настанот пристигнале брод на крајбрежната стража, патролно возило, хеликоптер на воздухопловните сили, два приватни чамци и доброволци на грчкиот спасувачки тим и започнале со потрага по лицата.
