Владата и Самостојниот синдикат за образование, наука и култура – СОНК викендов ги продолжуваат разговорите во обид да се најде заемно прифатливо решение за зголемување на платите во образованието и предучилишното воспитување и згрижување.
Од СОНК велат дека се уште не добиле конкретен предлог за зголемување на платите и оти до крајот на викендов треба да одлучат за главното барање од Владата, за ставање на штрајкот во мирување и враќање на учениците на настава.
– Добивме некои информации кои повторно не се поврзани со утврдување процент. Сега Советот на СОНК ќе расправа во однос на расправите што ги имавме во Владата и ќе дадеме насоки во однос на членството за изјаснување за главното барање од Владата, во интерес на учениците и децата во градинките, штрајкот да се стави во мирување, се додека за два-три дена, конечено не се дефинира нивниот предлог, а нашето прифаќање или отфрлање – изјави вчера синдикалниот лидер Јаким Неделков.
Колку ќе се зголемат платите на учителите, Владата и СОНК ќе утврдуваат викендов
Вчерашната средба меѓу претставниците на Владата и на СОНК беше на петиот ден од штрајкот во основните и во средните училишта и во градинките.
Засега е неизвесно дали штрајкот на СОНК што почна во понеделникот, ќе продолжи и следната недела.
На последниот состанок во Владата било договорено во наредните денови да се утврди процентот за зголемување на платата кое ќе се испланира и потенцијално реализира со ребалансот на Буџетот, по што учениците од основното и средното образование од понеделник би се вратиле во училишните клупи, а децата од предучилишното воспитување и згрижување во градинките.
Дополнително се разговарало веднаш да почне сеопфатен дијалог со активно учество на синдикатот за трајно решавање на континуираниот раст на платите.
Од Владата вчера соопштија дека се отворени за дијалог за постигнување систем за раст на платите кој нема да биде условен и предизвикуван од штрајкови и незадоволства и со кој ќе се обезбеди модел за раст на платите во јавниот сектор, кој како со договорот за минималната плата, ќе се врзе за порастот на просечната плата и со порастот на трошоците за живот.
