Естонскиот конзул во Санкт Петерсбург бил приведен затоа што добил „тајни документи“, објави денеска руската тајна служба „ФСБ“.
– Федералните служби за безбедност ја уапсија Марта Лате, естонски дипломат и конзул во Санкт Петербург, додека примаше тајни документи од руски државјанин – соопшти службата, пренесоа руските новински агенции.
– Тоа не е во согласност со дипломатскиот статус и очигледно е непријателски настроена кон Русија. Ќе бидат преземени мерки против странскиот дипломат во согласност со меѓународното право – се вели во соопштението.
Ова е нов во низата шпионски скандали меѓу Москва и Западот во последните неколку години, кои следат по ескалацијата на тензиите по руската анексија на Крим во 2014 година.
Во април, украинскиот конзул во Санкт Петерсбург, Александар Сосониук, беше уапсен во обидот да добие тајни информации и беше замолен да ја напушти руската територија.
Русија е обвинета за повеќе шпионски скандали во неколку европски земји, што води до меѓусебно протерување на дипломатите, пишуваат агенциите.
