Шведска ќе биде првата во светот што ќе добие електричен автопат, а до 2045 година би можела да има дури 3.000 километри електрични патишта. Со оглед на тоа што Европската Унија минатиот месец одлучи дека сите нови автомобили нема да смеат да испуштаат јаглерод диоксид (ЦО2) од 2035 година, нејзините членки се стремат да имаат инфраструктура за патување без фосилни горива.
Електричниот автопат ќе овозможи полнење на батеријата на возилата додека се движат по него. Експертите сметаат дека тоа ќе значи подолги патувања за возилата со помал капацитет на батериите. Со ова треба да се спречи долгото чекање на станиците за полнење.
Шведска е пионер во електрификацијата на патиштата преку неколку проекти, а меѓу овие проекти е и електричен автопат што треба да ги поврзе логистичките центри меѓу градовите Халсберг и Оребро, кои се наоѓаат помеѓу три големи града – Стокхолм, Гетеборг и Малме, пренесува „Еуроњус“.
Првата делница од електричниот автопат треба да биде изградена до 2025 година, но сѐ уште не е одлучено како ќе овозможи полнење на возилата. Постојат три можности, а тоа се систем за контакт, индуктивен систем и спроводлив систем.
Само тешките возила можеа да се полнат со синџирниот мрежен систем. Тоа е систем што во моментов се користи за напојување трамваи и тролејбуси. Овој тип систем за тешки електрични возила е во употреба од 2018 година на патот што ги поврзува аеродромот „Арланда“ во Стокхолм и логистичкиот центар во Розерсберг. На патот долг два километра има контактна шина на која е поврзано возилото за да се напојува со електрична енергија.
Индуктивниот систем подразбира дека има специјална опрема под патот што го напојува возилото. Намотката во возилото ја користи таа струја за полнење на батеријата.
Спроводниот систем работи како полнач за паметни телефони. Но наместо полнач, на патот има подлога што овозможува безжично полнење. Во 2020 година, во шведскиот град Визби беше овозможено безжично полнење на електричните автобуси и камиони.
Истражувањето покажа дека големината на батериите на автомобилите може да се намали за 70 отсто со електрични патишта. Притоа беше утврдено дека нема да мора да се електрифицираат сите патишта во Шведска. Се проценува дека би било неопходно да се електрифицираат 25 отсто од патиштата. Шведска соработува со Германија и Франција во однос на изградбата на електрични патишта што имаат намера да ги градат и Италија, Велика Британија и САД.
