Врвна оптометристка открива шест работи што вашите очи можат да ги навестат за целокупното здравје. Софи Кох, офталмолог и советничка за национални професионални услуги во „Оптометри Австралија“, откри како можете да откриете низа хронични болести, како што е дијабетес, па дури и рак, гледајќи во нечии очи. Таа рече дека работи како што се крвави дамки во задниот дел на окото, отечени оптички нерви, па дури и сив прстен околу рожницата може да бидат знак дека се случува нешто. Таа ги советува луѓето да прават целосен очен преглед на секои две години, не само за да се одржи визуелната острина туку и да се забележат раните знаци на разни болести.
– Анатомски гледано, окото има две неверојатно уникатни својства; прво, мрежницата е единственото место во телото каде што вашите крвни садови можат јасно да се видат без да ви пречи околното ткиво. Второ, 40 проценти од нервните влакна поврзани со мозокот се поврзани и со мрежницата, така што раните промени во здравјето на очите и видот може да укажуваат на други пошироки здравствени проблеми што се случуваат – рече таа.
Софи додаде дека абнормалностите во окото што можат да се откријат само при очен преглед може да бидат знак за одредени видови на рак, зголемен ризик од мозочен удар, дијабетес, мултипла склероза, висок холестерол или болест на тироидната жлезда. Иако симптомите не се нужно убедлив доказ за рак или некоја посебна состојба, очниот преглед може да помогне да се открие болеста во раните фази.
Рак
Изненадувачки, окото може да биде првото место што покажува рани знаци на низа видови на рак, вклучувајќи тумори на мозокот, меланом, леукемија и лимфом.
– Отекување на оптичкиот нерв, крвава мрежница и нови или неправилни бенки на предната и задната страна на окото, сето тоа може да укажува дека се случува нешто сериозно – вели Софи.
Тоа е една од причините зошто е важно децата и младите да направат очен преглед, дури и ако не се жалат на проблеми со видот. Вашиот офталмолог можеби е првата личност што ќе го открие тоа за време на рутински очен преглед.
Мозочен удар
За време на очен преглед, лекарите можат да забележат микроскопски згрутчувања на крвта во задниот дел на окото, што може да укажува на оштетување на крвните садови од високиот крвен притисок и понекогаш значи дека кај некого може да има поголема веројатност да има мозочен удар.
– Блокада или згрутчување на мрежницата може да биде првиот знак дека личноста е изложена на зголемен ризик од мозочен удар. Ако пациентот доживее ненадејно губење на страничниот вид, тоа може да биде и предупредувачки знак дека настанало оштетување на мозокот – рече таа.
Дијабетес
Експертите можат да ги забележат и раните знаци на дијабетес.
– Дијабетичната ретинопатија влијае на капиларите во мрежницата и првично се појавува како крвави дамки во задниот дел на окото, кои може да се забележат при рутински очен преглед – објасни таа.
Подрастични промени во видот не се забележуваат додека состојбата не напредува во напредни фази, така што редовните очни прегледи можат рано да ја откријат абнормалноста.
Мултипла склероза
Мултипла склероза (МС) може да предизвика состојба наречена оптички невритис, каде што оптичкиот нерв отекува и предизвикува заматен вид. Кај речиси 25 проценти од луѓето на кои им била дијагностицирана МС, оптичкиот невритис бил првиот симптом што го доживеале.
– Отекувањето на оптичкиот нерв може да биде првиот знак на мултипла склероза. Обвивката што го покрива оптичкиот нерв, наречена миелин, отекува и на тој начин го оштетува оптичкиот нерв, а ги нарушува и визуелните информации во вашиот мозок – рече таа.
Високо ниво на холестерол
Ако видите бел, син или сив прстен околу рожницата, тоа може да значи дека има акумулација на холестерол во крвотокот.
– Тоа може да се случи дури и во вашите триесетти и четириесетти години. Вашиот офталмолог може да препорача дополнителни тестови за да се процени нивото на холестерол во крвта – наведува Софи.
Таа додава дека високиот холестерол треба да се сфати сериозно бидејќи може да биде претходник на опасни состојби по животот, како што е мозочниот удар.
Болест на тироидната жлезда
Според Австралиската фондација за тироидна жлезда, повеќе од еден милион Австралијци живеат со недијагностицирано нарушување на тироидната жлезда.
– Поврзан со автоимуното нарушување, наречено Грејвсова болест, хипертироидизмот не само што може да ви ги зацрвени очите и да ве чеша туку во посериозни случаи може да предизвика отекување на очните мускули предизвикувајќи испакнување на очните јаболка и двоен вид – вели офталмологот.
