Огромната лична библиотека на влијателниот натуралист и биолог Чарлс Дарвин ќе биде целосно објавена на интернет за првпат. Научниците велат дека збирката книги, од кои голем дел претходно биле непознати или необјавени, укажуваат на „необичниот обем“ на истражувањето на Дарвин. Каталогот од 300 страници детално ќе ја претстави личната колекција на книги на научникот, која се состои од 7.400 наслови и 13.000 тома.
Претходните списоци вклучуваа само 15 проценти од библиотеката. Тие вклучуваат книги, памфлети и списанија за теми како што се биологија, геологија, филозофија, психологија и религија, како и уметност, историја и патувања. Меѓу новооткриените дела е и германско списание со првата позната фотографија од бактерија. Повеќето од делата се на англиски јазик, иако половината се објавени на други јазици, германски, француски, италијански, шпански, холандски и на дански.
Проектот, наречен „Целосното дело на Чарлс Дарвин онлајн“, траеше 18 години, а неговото објавување се совпаѓа со 215-годишнината од раѓањето на Дарвин. Ја водеше д-р Џон ван Вај од Одделот за биолошки науки на Националниот универзитет во Сингапур.
– Ваква детална презентација на комплетната библиотека на Дарвин е без преседан и ни овозможува да го цениме повеќе од кога било досега фактот дека Дарвин не бил изолиран научник што работел сам, туку исклучителен експерт на своето време, кој ги изградил своите дела на софистицирана наука, студии и знаењето на илјадници соработници. Навистина, големината и опсегот на делата на неговата библиотека укажуваат на извонредниот интерес и обемот на истражувањето на Дарвин и работата на другите – рече Ван Вај.
Проектот вклучува и виртуелна реконструкција на библиотеката со 9.300 линка до копии од дела, кои се достапни бесплатно.
Дарвин починал во 1882 година, а пописот на неговиот дом забележал повеќе од 2.000 врзани книги. Истражувачите користеле рачно напишан каталог од 426 страници од 1875 година и ги споредиле неговите кратенки за да откријат 440 непознати наслови, кои првично биле во библиотеката. Други извори вклучуваат списоци со памфлети, неговите лични тетратки и белешки, дневниците на неговата сопруга Ема Дарвин, книги подарени на Ботаничкото училиште во Кембриџ во 1908 година и 30 тома од преписката на Дарвин, збирки писма што биологот ги напишал и им ги испратил на луѓето низ светот.
