Во софиската галерија за современа уметност „Структура“ е отворена изложбата на дела од 19 македонски современи автори: Елена Чемерска, Искра Димитрова, Христина Ивановска, Славица Јанашлиева, Ѓорге Јовановиќ, Филип Јовановски, Верица Ковачевска, Шќипе Мехмети, Оливер Мусовиќ, Наташа Неделкова, Доротеј Нешовски, OПА, Александра Петрушевска Ристовска, Нада Прља, Дита Старова Керими, Никола Узуновски, Драгана Заревска, Ѓорги Деспотов, Велимир Жерновски.
На изложбата, составена од кураторката Ивана Васева, може да се видат уметнички инсталации, ликовни објекти, видеоарт, перформанс, па до класични форми на изразување, како цртеж и сликарство. Изложбата е продуцирана од Факултетот за работи што не се учат (ФРУ), во партнерство со галеријата „Структура“, во рамките на фестивалот за современи уметности АКТО.
