Рускиот претседател Владимир Путин ја испрати фрегатата „Адмирал Горшков“, вооружена со хиперсонични крстосувачки ракети „Циркон“ кон Атлантскиот Океан, пренесоа светските агенции. Церемонијата на испраќање беше преку видеоконференциска врска.
За време на церемонијата, Путин од неговата резиденција во Ново Огарјово разговараше со министерот за одбрана Сергеј Шојгу и со Игор Крохмал, командант на фрегатата.
– Овој пат бродот е опремен со најновиот хиперсоничен ракетен систем – „Циркон“ – кој нема аналози, рече Путин и појасни дека се работи за хиперсоничен систем базиран за море.
Рускиот претседател му посака се најдобро на екипажот на фрегата и им нареди да ги започнат своите задачи.
Шојгу изјави дека „Адмирал Горшков“ ќе плови во Атлантскиот и Индискиот Океан и во Средоземното Море.
Фрегатата е дел од руската морнарица од 2018 година и беше подложена на планирано техничко одржување во 2022 година. Нејзиното главно вооружување е ракетниот комплекс Калибар-НК. Фрегатата „Адмирал Горшков“ активно учествуваше во тестирањата на ракетите „Циркон“.
