Американскиот весник „Волстрит џурнал“ (The Wall Street Journal), повикувајќи се на американски претставници од одбраната и разузнавањето, пишува дека руската воена соработка со Иран, Северна Кореја и Кина се проширила на размена на чувствителни технологии, што може да ги загрози Соединетите Американски Држави (САД) и нивните сојузници, дури и долго по завршувањето на војната во Украина.
Американскиот весник наведува дека безбедносните односи меѓу соперниците на Соединетите Американски Држави, кои се забрзуваат и продлабочуваат, ги изненадиле американските разузнавачки аналитичари. Тие наведуваат дека Русија и другите земји ги оставија настрана нивните историски судири и одлучија колективно да се спротивстават на она што го гледаат како светски поредок во кој доминира Вашингтон.
Рускиот претседател Владимир Путин во средата откри дека тој и неговиот севернокорејски колега Ким Јонг-ун постигнале договор за давање взаемна помош во случај која било земја да биде нападната, што американскиот весник го гледа како показател за зајакнување на воените односи помеѓу двете земји.
Во својот извештај, „Волстрит џурнал“ наведува дека Русија ги проширила своите контакти со Северна Кореја, Иран и Кина по избивање на војната во Украина. Според извештајот, таа комуникација се претворила во заеднички договори за производство на одбранбени технологии, трансфер на технологија и понуда на работна сила. Официјални лица веруваат дека ова се договори кои ќе ги подобрат можностите на Москва на долг рок, а можеби и оние на Техеран, Пјонгјанг и Пекинг.
„Волстрит џурнал“ истакнува дека Иран ѝ помогнал на Русија да изгради фабрика за производство на борбени дронови во Република Татарстан во Руската Федерација. Американските власти веруваат дека фабриката сега е оперативна и способна да произведува илјадници беспилотни летала Шахед-136, дизајнирани од Иран. Овие официјални лица очекуваат производството на фабриката да се прошири и на други видови беспилотни летала.
Весникот цитира американски воен функционер, без да го именува, како вели дека она што започна како трансакциски однос „сега стана трансфер на знаење“. Тој предупреди дека Иран може да следи како неговите беспилотни летала се однесуваат во воени услови, имајќи предвид дека Русија лансира десетици такви авиони во Украина. Опасноста е дека Иран може да извлече лекции од тоа искуство и да ги искористи на Блискиот Исток.
Американските и јужнокорејските власти веруваат дека Русија може да му обезбеди на Пјонгјанг вселенска технологија и други напредни системи во замена за артилериска муниција и балистички ракети со краток дострел, кои според нив, Северна Кореја и ги доставила на Русија за војната во Украина, посочува американскиот весник.
Според некои американски претставници, Северна Кореја, исто така, испраќа работници во Русија за да помогнат во одржувањето на линиите за производство на оружје. Москва, пак, го снабдува Пјонгјанг со големи количини мазут, пишува „Волстрит џурнал“.
Сепак, сегашните и поранешните американски функционери веруваат дека проширените безбедносни врски меѓу Русија, Северна Кореја, Иран и Кина сè уште не го достигнале нивото на формален воен сојуз, како што е Организацијата на Северноатлантскиот договор (НАТО) на Запад. Сепак, „Волстрит џурнал“ посочува дека се појавуваат првите знаци за формирање на нова оска, со индиции за поширока стратешка и дипломатска соработка.
