Поранешниот германски канцелар Герхард Шредер, кој е и пријател на рускиот претседател Владимир Путин, изјави дека шефот на Кремљ сака да преговара за решение на војната во Украина.
– Добрата вест е дека Кремљ сака договорено решение. Првиот успех е договорот за житото, кој можеби полека може да се прошири до прекин на огнот – рече Шредер.
Тој додаде дека минатата недела се сретнал со Путин во Москва.
Да потсетиме, Русија и Украина постигнаа договор за деблокирање на извозот на жито од пристаништата на Црното Море, а во Турција синоќа пристигна првиот брод што превезува украинско жито на светските пазари од почетокот на инвазијата.
Поранешниот германски канцелар порача дека решението за важните прашања, како што е Крим, треба да се најде со текот на времето, во следната генерација. Тој предложи модел на швајцарски кантон за иднината на регионот Донбас, додавајќи дека ќе треба да види дали Путин ќе се врати на предвоената контактна линија во прекинот на огнот.
Инаку, Шредер ја критикуваше војната во Украина, но не го осуди рускиот претседател Владимир Путин.
Песков: Русија е подготвена за преговори со Украина, но по свои услови
Русија била и останува подготвена да го реши украинскиот проблем по дипломатски пат, но Москва ќе го стори тоа под свои услови и тие ќе бидат исполнети на овој или оној начин, изјави портпаролот на Кремљ, Дмитриј Песков.
– Навистина, Русија беше и останува подготвена да го реши украинскиот проблем дипломатски – по свои услови. Овде едноставно е соодветно уште еднаш да потсетиме дека овие услови се договорени во Истанбул. А за нив се согласија и двете страни – преговарачите на Русија и Украина – посочи Песков.
Портпаролот на Кремљ потсети дека подоцна Киев се откажал од овој договор и скршнал од преговарачката патека.
– И да, Русија е подготвена за преговори. Нашите услови ѝ се добро познати на украинската страна. Вака или онака ќе бидат обезбедени – заклучи Песков.
