Француската полиција го уапси пилотот, кој најави дека со авион-цесна ќе удри во париската Богородична црква, пренесуваат француските гласила. Полицијата тврди дека за време на претресот не нашла планови за таква акција. Уапсениот пилот е под психијатриска опсервација.
Поранешниот пилот на патнички авиони беше уапсен во четвртокот во Париз, откако на пријател му најавил дека ќе удри во катедралата Нотр Дам со мал авион.
Човекот што го пријавил тврди дека поранешниот пилот имал проблеми со пари и алкохол, како и дека е психолошки нестабилен.
Тој беше уапсен во локалната црква, а во моментот на апсењето носеше шише виски во џебот, пренесуваат медиумите.
Според нивните извештаи, за време на претресот во неговата соба, полицијата не нашла ништо за да ги потврди тврдењата дека тој планирал да удри со авион во катедралата.
