На жените повеќе нема да им биде дозволено да посетуваат предавања или да работат на Универзитетот во Кабул додека не се создаде „исламска средина“, изјави портпаролот на талибанците.

„Сѐ додека не постои вистинска исламска средина, на жените нема да им биде дозволено да доаѓаат на универзитет – на училиште или на работа. Исламот, пред сѐ“, рече Мохамед Ашраф Гаират.

Претходно оваа недела, Гаират на „Твитер“ напиша дека Универзитетот во Пашту работи на создавање план што ќе овозможи образование за студентки, но не прецизира кога ќе се имплементира.

„Поради малиот број предавачи, работиме на план што ќе им овозможи на мажите да им држат предавања на жените, но зад завесата што ќе ја поставиме во аудиториумите. Ова ќе создаде средина што ќе биде во согласност со исламот“, рече тој.