Меѓу жртвите на трагедијата во дискотека во Кочани е и Андреј Лазаров, фудбалер на Шкупи.
– Со длабока болка и огромна тага ја споделуваме веста дека нашиот фудбалер Андреј Лазаров е потврден како една од жртвите во трагичниот пожар што се случи во текот на ноќта во Кочани. Како херојска душа што беше, Лазаров го загуби животот обидувајќи се да им помогне на другите да се спасат од просторот зафатен од пожар. Тој се задуши од чадот за време на неговите обиди да спаси животи, покажувајќи храброст и хуманост до последниот момент. Неговиот херојски чин засекогаш ќе остане во нашето сеќавање, како сведоштво за неговиот благороден карактер и неговото големо срце. Ова е огромна загуба за нашиот клуб, за неговите соиграчи и за целата фудбалска заедница. Зборовите се мали за да ја опишат болката што ја чувствуваме во овие моменти, во оваа трагедија, една од најголемите во која е погоден нашиот клуб во неговата историја. ФК Шкупи изразува најискрено сочувство до неговото семејство, неговите блиски и целото големо семејство на нашиот клуб. Андреј беше дел од ФК Шкупи само шест месеци, но неговото име засекогаш ќе остане неизбришлив дел од нашиот тим. Споменот за него ќе живее вечно во нашите срца – објави фудбалскиот клуб Шкупи.
Лазаров (25) во својата кариера играше и за хрватските клубови Рудеш и Горица, потоа за Тиквеш, Металург и за Работнички. Г.И.
