Во четвртокот, меѓународниот сојуз на фудбалери ФИФПРО, заедно со Англиската асоцијација на професионални фудбалери (ПФА) и францускиот сојуз на играчи (УНФП), кои се нејзини членки, поднесоа тужба до судот во Брисел против ФИФА за одржување на Светско клупско првенство.
Првото издание на проширеното Светско клупско првенство со 32 учесници е предвидено да се одржи на крајот од следната сезона во САД. На оваа идеја, заедно со ФИФПРО, се спротивставува и Светската фудбалска асоцијација (ВЛА), која исто така се закани со правни дејствија против чадор меѓународната фудбалска организација доколку не ги разгледа нејзините планови за тоа натпреварување.
Бидејќи ФИФА одби да ги разгледа промените дури и минатиот месец, ФИФПРО презеде акција.
– Европските членки на ФИФПРО поднесоа тужба против ФИФА, оспорувајќи ја нејзината одлука за еднострано уредување на меѓународниот календар на натпревари и особено одлуката за креирање и уредување на распоредот на Светското клупско првенство во 2025 година. Синдикатите на фудбалерите се убедени дека овие одлуки ги кршат нивните права како и правата на нивните здруженија според Повелбата за основните права на Европската Унија. Тие, исто така, потенцијално го прекршуваат Законот на ЕУ за конкуренција – соопшти ФИФПРО.
Минатиот месец, ФИФПРО и ВЛА ја изразија својата загриженост во писмо до претседателот и генерален секретар на ФИФА, Џани Инфантино и Матијас Графстром дека меѓународниот фудбалски календар е „презаситен“. Како резултат на тоа, националните лиги не можат правилно да ги организираат своите натпревари, а играчите се туркаат надвор од нивните граници со зголемен ризик од повреди.
ФИФА ги отфрли сите наводи во тоа писмо.
