Актуелниот светски првак Франција во полуфиналето нема да игра со Норвешка, актуелниот европски и олимписки шампион, која ќе ги одмери силите со Унгарија. Франција ќе се сретне со Данска или со Холандија
ЕВРОПСКО ПРВЕНСТВО ВО РАКОМЕТ ЗА ЖЕНИ
Врвните перформанси му помагаа на актуелниот светски првак, репрезентацијата на Франција да остане досега непоразена на Европското првенство (ЕП) за ракометарки, кое се игра во Унгарија, Австрија и во Швајцарија. Унгарските навивачи ја наполнија арената „Фоникс“ во Дебрецин за да ја поддржат својата селекција од трибините во нивниот последен меч од главната рунда против Франција, но триколорите го освоија првото место во групата 1, по тешката победа со 30-27 над еден од кодомаќините на ЕП.
Пред натпреварот, Франција и Унгарија беа единствените непоразени селекции во групата 1. Двете репрезентации го покажаа својот квалитет на теренот со спектакуларни голови и импресивна тактика. Со тоа актуелниот светски првак Франција ја одбегна Норвешка, актуелниот европски и олимписки шампион во полуфиналето, која, пак, ќе ги одмери силите со Унгарија.
Шведска и Црна Гора го затворија главниот круг во Дебрецин со битка за билет во Виена за пласман за петтата позиција на ЕП. Откако беше чекор понапред во поголемиот дел од мечот, Шведска минимално славеше со 25-24 и со тоа се пласира на третото место во групата 1. Јохана Бундсен имаше 12 импресивни одбрани во најважните моменти од натпреварот. Пред ова ЕП двете селекции имаа четири претходни дуели на континенталните првенства, три од нив ги добија Црногорките. Единствениот пат кога Шведска победи на ЕП беше во 2014 година, во Будимпешта (Унгарија), кога двете селекции се бореа за бронзениот медал. Шведска во мечот за петтото место на ЕП 2024 ќе игра со поразениот од дуелот синоќа помеѓу Данска и Холандија.
Дојде и до промена во статистичките податоци, па сега најефикасна е Дурдина Јауковиќ, левиот бек од Црна Гора, со 47 гола (58 отсто на успешност), најдобра голманка е Швеѓанката Јохана Бундсен со 71 одбрана (35,5 отсто), а најсилниот шут и понатаму го има Романката Марија Базалиу (114,26 км/ч.). Г.И.
ЕП 2024
Група 1
Романија – Полска 24-29
Унгарија – Франција 27-30
Шведска – Црна Гора 25-24
ТАБЕЛА
Франција 5 5 0 0 10
Унгарија 5 4 0 1 8
Шведска 5 2 0 3 4
Црна Гора 5 2 0 3 4
Полска 5 1 0 4 2
Романија 5 1 0 4 2
Група 2
Словенија – Германија синоќа
Данска – Холандија синоќа
Швајцарија – Норвешка синоќа
ТАБЕЛА
Норвешка 4 4 0 0 8
Данска 4 3 0 1 6
Холандија 4 3 0 1 6
Словенија 4 1 0 3 2
Германија 4 1 0 3 2
Швајцарија 4 0 0 4 0
ПОЛУФИНАЛЕ
Франција – Данска или Холандија
Норвешка – Унгарија
МЕЧ ЗА ПЕТТО МЕСТО
Шведска – Данска или Холандија
