Денешната полудиригирана ждрепка може да донесе репризи на 10 претходни финалиња од Лигата на нациите, европските и од светските првенства, во кои меѓу себе играа селекции што се меѓу осумте најдобри сезонава во Лигата на нациите, Шпанија, Германија, Португалија, Франција, Италија, Холандија, Данска и Хрватска
ФУДБАЛ – ЛИГА НА НАЦИИ, ЖДРЕПКА
Двојките од четврт-финалето и дуелите од плејофот за опстанок во лигите од Лигата на нациите ќе бидат одредени денеска со ждрепката во седиштето на Европската фудбалска унија (УЕФА), од 12 часот. Ќе има вкупно пет извлекувања, и тоа за четирите двојки од четврт-финалето, а потоа и за полуфиналето на патот кон трофејот, како и три извлекувања за доигрувањата за опстанок во лигите А, Б и Ц.
Пред ждрепката за четврт-финалето носители се репрезентациите на Шпанија, Германија, Португалија и на Франција, како победници на групите во лигата А, а неносители се селекциите на Италија, Холандија, Данска и на Хрватска, кои беа второпласирани во своите групи. Ждрепката е полудиригирана, бидејќи нема да можат меѓу себе да играат репрезентации што се сретнаа во групната фаза (Шпанија и Данска, Германија и Холандија, Португалија и Хрватска, Франција и Италија).
Можни се дуели репризи на претходни финалиња, откако во мечевите за трофејот во Лигата на нациите играа Португалија и Холандија во 2019 година, како и Шпанија и Хрватска во 2023 година. Можни се и двојки на селекции што имале и меѓусебни средби за медали на други големи натпреварувања, европските (ЕП) и светските првенства (СП), како на пример финалињата Данска – Германија на ЕП 1992, Франција – Италија на ЕП 2000 и на СП 2006, Шпанија – Италија на ЕП 2012, Германија – Холандија на СП 1974, Италија – Германија на СП 1982, Шпанија – Холандија на СП 2010, Франција – Хрватска на СП 2018…
Меѓу осумте најдобри сезонава се сите досегашни финалисти на ова натпреварување, Португалија, Холандија, Шпанија, Франција и Хрватска, како и репрезентациите на земјите што досега беа домаќини на фајналфор-турнирот, Португалија, Италија и Холандија.
Сите натпревари од плејофот и од четврт-финалето на програмата се од 20 до 31 март в година, а финалниот турнир на Лигата на нациите е закажан од 4 до 8 јуни. Н.М.
ЖДРЕПКА ЗА ЧЕТВРТ-ФИНАЛЕТО НА ЛИГАТА НА НАЦИИТЕ
Носители: Шпанија, Германија, Португалија и на Франција
Неносители: Италија, Холандија, Данска и на Хрватска меѓу себе нема да играат репрезентации што се сретнаа во групната фаза
