ФУДБАЛ
Хари Кејн (31) постигна над 400 гола за повеќе клубови и за репрезентацијата и е во голема форма од неговиот трансфер во 2023 година од Тотенхем во Баерн, а пред почетокот на плејофот во Лигата на шампионите зборуваше за Европската фудбалска унија (УЕФА) за клучните аспекти од својата игра.
– Себеси се гледам како број девет, очигледно, како стрелец, пред сѐ. Но, исто така, сакам да можам да бидам вклучен во играта многу повеќе од, можеби, другите „деветки“. Сакам да ја поврзувам играта, сакам да можам да ја држам топката кога тимот е под притисок. Бројот девет ќе се оценува според головите, но мислам дека е важно кога не постигнувате голови, сепак, да влијаете на тимот, и тоа е она што јас се обидувам да го направам, и со и без топка. Голем дел од работата што ја работиме во високиот притисок почнува од нас, почнува со мене како број девет. Кога бев играч на младински тим, играв многу во средниот ред, како бр. осум, како бр. десет. Тоа ми помогна да бидам свесен за моите соиграчи околу мене. А потоа, како што стареев, станав повеќе број девет затоа што бев добар во постигнување голови и добар во трчање – вели Кејн.
Во разговорот со УЕФА тој зборуваше и за голгетерскиот инстинкт и за менталната сила.
– Постигнувањето гол секогаш беше нешто што можев да го направам. Но во раните тинејџерски години работев навистина напорно на сите различни типови постигнување гол, затоа што разбрав дека во играта нема постојано да го постигнувате само совршениот гол. Важно е да можеш да работиш со десна нога, лева нога, глава, слободни удари, пенали, што било. Играте многу мечеви, немате многу слободно време да обработите нешто. Ќе има издигнувања и ќе има падови, мора да прифатите дека ќе има моменти кога нема да се чувствувате толку добро психички, но само се обидувате да се сетите на сета напорна работа што сте ја направиле за да стигнете тука. Тешко е кога работите не одат толку добро, кога губите мечеви, но мислам дека тогаш се покажуваат вистинските карактери и лидери. Важно е само да останете фокусирани на она што можете да го направите и да се обидете да се подобрите и да му помогнете на тимот, и тоа е она за што јас се трудам и го правам – вели Кејн за УЕФА. Н.М.
