Животни
Само затоа што вашата мачка сака да душка по ходниците на вашата зграда, не мора да значи дека ѝ треба прошетка во урбана средина. Исто така, мачките што често стојат покрај стаклени врати или прозорци и гледаат во надворешниот свет не се секогаш подготвени за она што ги чека таму. Всушност, нема да знаете дали ќе ѝ одговара прошетката на поводник додека не пробате.
Она што ви треба, ако сакате да ја шетате вашата мачка на поводник, е дефинитивно трпение. Делумно затоа што мачките се многу флексибилни и агилни, па класичното ремче не е опција, бидејќи ја зголемува веројатноста за бегство. Друга причина е тоа што ремчето може многу лесно да го затегне вратот на мачката и да доведе до задушување. Во тој случај, појас со ремен е најдобрата опција. И, секако, колку побрзо почнете да ја навикнувате вашата мачка на поводник, толку поуспешни ќе бидете во тој потфат.
Пред да го ставите појасот на мачката, дозволете ѝ да го издушка и да се запознае со него. Ако ви се чини дека познанството поминало добро, обидете се да ѝ го ставите појасот и да ја оставите да се движи со него низ куќата. Потребно е време за да се навикне на оваа нова работа на себе. По неколку дена вежбање, обидете се да го закачите ременот, но не влечете го веднаш. Нека го влече и него наоколу. Кога ќе сфати дека тој не ѝ претставува закана, прошетајте се низ куќата. Ако успеете, можете да излезете надвор.
