Султанот Ибрахим од јужната држава Џохор ќе ја извршува главно церемонијалната функција пет години
Малезија објави дека нејзиниот следен и 17-ти крал ќе биде султанот Ибрахим Султан Искандар од јужната држава Џохор. Султанот Ибрахим беше избран од деветте султани на земјата на седницата на Конференцијата на владетелите минатиот петок и ќе биде поставен на 31 јануари следната година.
– Со ова информирам дека Конференцијата на владетелите, за време на нејзиниот 263-ти (специјален) состанок, одржан во Националната палата во петокот, 27 октомври 2023 година, се согласи да изјави дека Неговото Кралско Височество Султан Ибрахим, Султан на Џохор Дарул Тазим, е избран за Негово Височество Јанг ди Пертуан Агонг Седумнаесетти за период од пет години, почнувајќи од 31 јануари 2024 година – се вели во соопштението на чуварот на кралскиот печат.
Јанг ди Пертуан Агонг или „кралот на кралевите“ е уставен монарх, но од историските избори во 2018 година и ротирачката врата на владејачките коалиции што следуваа, кралот презеде поактивна улога во политиката.
Кралот Ал Султан Абдула ги искористи дискрециските овластувања на монархот за да ги избере последните тројца премиери на земјата, вклучувајќи и по изборите во 2022 година кога ниту една партија не освои парламентарно мнозинство.
Султанот Ибрахим, за кого се вели дека има страст за брзи автомобили и мотоцикли и има големи деловни интереси, е познат и по годишното патување низ Џохор за да се сретне со луѓето од државата.
Оженет и со шест деца, 64-годишникот е обучен да лета со авиони и хеликоптери, има „дух на војник и се истакнува во морски активности и други екстремни спортови“, според веб-страницата за кралското семејство.
Таткото на султанот Ибрахим беше осмиот крал на земјата, кој го држеше тронот помеѓу 1984 и 1989 година.
Кралското семејство Џохор потекнува од почетокот на 16 век и има своја приватна војска.
За многумина од мнозинството Малајци во земјата, особено во руралните области, кралското семејство останува моќен симбол на идентитетот. Султаните се чувари на исламот во нивните држави, додека кралот е и заштитник на религијата во државите каде што нема наследен монарх. Малезиските Малајци се секогаш муслимани.
Шефот на државата живее во наменски изградена палата со 22 жолти куполи во внатрешното западно предградие на Куала Лумпур. Тој, исто така, дејствува како врховен командант на вооружените сили и има моќ да им дава помилување на осудените.
