Долготрајната изложеност на микрогравитација предизвикува различни биолошки промени, од губење на густината на коските до промени во кардиоваскуларните функции. Затоа вселенското летало „Драгон“ на „Спејс екс“ доставува срцево ткиво до Меѓународната вселенска станица за експерименти.
Вселенското летало „Драгон“ ќе се приклучи на Меѓународната вселенска станица за да го испорача срцевото ткиво, по што ќе се спроведат различни биолошки експерименти во вселенската лабораторија за тестирање лекови и клеточни терапии против здравствените компликации предизвикани од микрогравитацијата. Делови од срцево ткиво ќе се користат за две студии, кардинално срце 2.0 и проектирани срцеви ткива-2.
Кардиналното срце 2.0 е всушност продолжение на првото, кое покажа дека четиринеделната изложеност на микрогравитација влијае на функцијата на клетките и генската експресија во срцето. Ова е причината зошто американската вселенска агенција НАСА користи срцеви органоиди и 3Д-структури за да ја тестира ефикасноста на клинички одобрените лекови за срцеви проблеми предизвикани од продолжен престој во микрогравитациската средина.
Вториот експеримент има цел внимателно да следи како функционира срцевиот мускул во микрогравитација, а тоа се постигнува со користење 3Д култивирано срцево мускулно ткиво. Експериментот се базира на кардиомиоцити, клетки што го градат срцевиот мускул. Овие клетки се одгледуваат со помош на матични клетки, кои се „сурови“ клетки на телото. Матичните клетки можат да се трансформираат во многу различни типови на клетки, вклучувајќи срцеви мускули, нервни и васкуларни клетки.
Експериментот користи магнет што е синхронизиран со контракцијата на мускулните клетки. Сензорите ги следат мускулните контракции во реално време додека магнетот се движи и, како резултат на тоа, научниците можат подобро да ја проучуваат работата на срцето во микрогравитација.
Според научните докази, човечкото срце може да се намали под влијание на микрогравитацијата, а тоа се должи на фактот дека бестежинската состојба ја менува структурата на срцето. Ова е особено опасно за астронаутите, бидејќи може да доведе до медицински компликации.
Истражувањето на НАСА со помош на 3Д-култури откри промени во срцето на клеточно и ткивно ниво. Познавањето на таквите промени може да доведе до рана дијагноза на развојот на срцеви заболувања. Тридимензионалните модели би можеле значително да ги подобрат медицинските истражувања и да го олеснат тестирањето на лекови за да се решат срцевите проблеми поврзани со микрогравитацијата. Во блиска иднина, истражувањето на Меѓународната вселенска станица може да биде корисно за решавање на проблемите поврзани со срцето.
НАСА наведува дека само во САД повеќе од 600.000 луѓе годишно умираат од кардиоваскуларни болести.
