ТЕНИС – ВО РАМКИТЕ НА МАСТЕРС-ТУРНИРОТ ВО МАДРИД
Рафаел Надал се врати на тенискиот терен на впечатлив начин во шпанската престолнина Мадрид, каде што настапи заедно со светскиот рекет број 1, Јаник Синер, и фудбалски ѕвезди на Реал Мадрид, пишува Асоцијацијата на тениските професионалци (АТП). Надал, кој се пензионира од професионалниот тенис во 2024 година, му беше партнер на голманот на Реал Мадрид, Тибо Куртоа, во пријателска сесија против Синер и играчот од средниот ред Џуд Белингем. Настапот беше дел од активностите поврзани со мастерс-турнирот од серијата 1.000 Мадрид опен, при што стадионот „Сантијаго Бернабеу“ се користи како привремено место за тениски тренинг за време на турнирот.
Стадионот, дом на фудбалскиот клуб Реал Мадрид, е адаптиран да биде домаќин на земјен терен како дел од турнирот, пишува АТП. Италијанецот Синер е првиот носител на турнирот. Вклученоста на Надал ја одразува неговата постојана поврзаност со турнирот и неговата поврзаност со Мадрид, пишува АТП. Во текот на својата кариера, поранешниот играч број 1 на ранг-листата на AТП освои рекордни пет титули на турнирот во Мадрид.
Ига Швјонтек, четвртата светска тенисерка на ВТА-листата, исто така беше присутна на местото на одржување во четвртокот. Полската тенисерка неодамна почна да работи со поранешниот тренер на Надал и тренираше во Академијата „Рафа Надал“ претходно овој месец, пишува АТП. Белингем присуствуваше на турнирот во средата за да го гледа тенисерот во подем, Шпанецот Рафаел Ходар, пишува АТП. Н.М.
