Покрај огромните пожари кои ја зафатија Австралија во изминатиов период, и неодамнешните поројни дождови, централниот дел на Нов Јужен Велс е погоден од огромна песочна бура. Бирото за метеорологија издаде серија сериозни предупредувања за грмотевици вчера вечер за внатрешен Нов Јужен Велс со придружни ветрови кои создаваат огромни облаци од прашина.
Видеата објавени на социјалните мрежи покажуваат дека невремето се спушта кон градот Дуббо и околните градови, а облаците од прашина биле толку густи што го блокирале сонцето.
Метеорологот од бирото за метеорологија, Роуз Бар, истакнала дека значителниот дожд во неделата е сконцентриран низ централните и северните делови на државата. Брзината на ветрот од 94 километри на час е забележана кај Паркес околу 6.30 часот, додека кај градот Дуббо забележана е брзина на ветрот од 107 километри на час во 7.45 часот.
Државната служба за вонредни состојби од вчера наутро добила 1.453 повици за помош, од кои повеќе од 1.000 биле за оштетувања на градбите. Повеќето градови на средно-северниот брег на Нов Јужен Велс и северните региони беа зафатени од обилни врнежи, а на некои места наврнале помеѓу 100 милиметри и 180 милиметри дожд.
Меѓутоа токму овие дождови во изминатите неколку дена обезбедија олеснување за сушните делови во Нов Јужен Велс и им помогнаа на пожарникарите да го забават ширењето на пожарите.
