Кандидатот за претседател на државата предложен од Левица, Билјана Ванковска вечерва пред партијата да излезе со индикации за тоа како се движат резултатите од денешното гласање изјави дека двојно зголемена излезноста во споредба со претседателските избори од 2019 година, зборува за поголемата понуда што ја имаа граѓаните, но и потребата на гласачите да го искажат својот глас. Оцени дека тоа што некои медиуми веќе ги соопштиле победниците не е демокраски однос.
-Може да се констатира дека се уште сме на ниво кога зборуваме за тоа дека кога нема поголеми нерегуларности ние сме среќни и задоволни дека денот поминал мирно без поголеми нарушувања. Останува нормално да се изанализираат оние нерегуларности, инциденти или случаи кои веќе беа нотирани за што секако и Левица ќе има свој став. Јас можам само да се заблагодарам на сите оние кои масовно излегоа денес. Практично, ако не се лажам во бројките, некаде во 17 часот беше двојно зголемена излезноста во споредба со претседателските избори од 2019 година, што зборува од една страна за поголемата понуда што ја имаа граѓаните, тогаш беа тројца кандидати, сега сме седуммина, меѓутоа претпоставувам дека станува збор и за зголемена побарувачка кај граѓаните, односно можност и потреба да го кажат својот глас, да го изразат своето мислење во однос на тоа каде се движи државата – рече Ванковска.
Изрази жалење што, како што рече, се добива впечаток дека во земјава се одвиваат два паралелни изборни процеси, бидејќи двајцата противкандидати од албанскиот блок, како да се натпреварувале меѓу себе околу тоа како поминале и како тоа ќе се рефлектира на парламентарните избори. Според неа, би било подобро кога сите кандидати би се обраќале на целата јавност.
Во однос на македонскиот блок, таа забележа дека некои медиуми веќе ги прогласиле победниците во првиот круг од изборите за претседател, што покажува фаворизирање и смета дека тоа не е демократско однесување.
-Тоа ме враќа малку на мојата прва прес-конференција, тоа беше на 7 февруари кога Левица ја објави намерата да собира потписи и едно од првите прашања беше кому Ванковска ќе му ги даде гласовите во вториот круг. И тоа прашање очигледно ме следи се до завршувањето на првиот овој изборен ден. Повторно велам фаворитите се наводно утврдени што малку ја убива возбудата кај граѓаните и верувам дека мнозина од нив тргнале со намера да дочекаат изненадување. Не зборувам само за мене, туку за кој било од противкандидатите, така што мислам дека тоа повторно покажува фаворизирање она што постојано го потенцирам дека кога медиумите дури и наводно анализираат или покануваат аналитичари еден од штаб, друг од другиот штаб создаваат претстава кај граѓаните дека сите други се аутсајдери, маргиналци, луѓе кои залутале во политиката што не е баш демократски однос би рекла кон сите нас- вели Ванковска.
Таа очекува дека поголемата излезност ќе значи и поголем број гласови за неа.
-Ќе почекаме да ги видиме резултатите. Ние се надеваме дека големата излезност значи повеќе гласови за мене како претставник на Левица и воопшто како човек кој ми се чини дека допре до поширок круг на граѓани не само до поддржувачите на Левица и не само до младите, туку една поширока структура барем од она јас што го имав како контакт жив со мнозина. Велам да почекаме уште малку па ќе правиме вистински анализи. Ова однапред завршување на трката за готова го сметам за преурането – вели претседателскиот кандидат на Левица Ванковска.
