По повод 30. годишнината од основањето на Македонскиот олимписки комитет (МОК) и 51. Генерално собрание на Европските олимписки комитети, денеска во Скопје првиот човек на Меѓународниот олимписки комитет (ИОК) Томас Бах оствари средби со шефот на државата Стево Пендаровски и претседателот на Македонскиот олимписки комитет (МОК) Даниел Димевски.
Димевски и Бах, како што е соопштено, договорија многу нови проекти за развој на МОК, а првиот човек на ИОК свечено ја отвори Лабораторијата на МОК за постигнување врвни спортски резултати, која е создадена да го следи психо-физичкиот развој на најдобрите македонски спортисти, но и да го унапреди истиот, како и да ги дијагностицира и менаџира однапред сите можни спортски повреди.
Претседателот на ИОК, Томас Бах воодушевен од сето она што го виде во Скопје и воопшто како се развива МОК и македонскиот спорт, на претседателот на МОК Димевски му ја врачи престижната награда – ИОК трофеј „Олимписка куќа“, соопшти МОК.
Претседателите Бах и Димевски, заедно со претседателот на Европскиот олимписки комитет, Спирос Капралос, остварија средба и со македонскиот претседател Стево Пендаровски на која се разговараше за многу проекти од заеднички интерес.
Бах, притоа, вети дека МОК и македонскиот спорт ќе биде уште повеќе поддржан од ИОК.
