Секој оној што се занимава со криминал ќе мора да носи одговорност за сето она што ќе го направи, а македонската полиција е тука и бурно ќе стои на браникот на безбедноста и сигурноста – изјави вечерва министерот за внатрешни работи Оливер Спасовски.
Околу завчерашниот вооружен напад под Кале, Спасовски рече дека е можно да станува збор за пресметка во рамки на една криминална структура или со други криминални групи, што ќе треба да го утврди истрагата.
– Спроведуваме опсежна оперативна активност, наречена „Безбеден град“ и таа активност е насочена токму кон такви криминални структури. Сето она што го преземаме, го преземаме за да се спречат рекетирања, закани, уцени и продажба на наркотични средства и оружје низ целиот град. Заради граѓаните, заради сите што заслужуваат мир и спокој полицијата продолжува со оперативната активност – рече Спасовски во одговор на прашање на МИА .
Министерот порача дека поддржувачите на криминалните структури во сите сфери на општественото живеење се повеќе се разочаруваат затоа што полицијата нема да дозволи некој да биде амнестиран за криминалот што го сторил.
Тој додаде дека истрагата околу инцидентот под Кале бара темелно утврдување на факти и докази и МВР ја спроведува во соработка со јавното обвинителство и дека сето она што ќе се утврди како факти, доказ и аргумент во моментот кога ќе биде завршена истрагата ќе и биде соопштено на јавноста.
