Заврши објаснувачкиот скрининг за Кластер 2
Со презентациите на Европската комисија за поглавјето 28 – Заштита на потрошувачите и јавното здравје, денеска во Брисел заврши објаснувачкиот скрининг за Кластер 2 – Внатрешен пазар, информираат од Секретаријатот за европски прашања.
Заштитата на потрошувачите и јавното здравје, нагласуваат од СЕП, претставува едно од најсложените и најпредизвикувачките прашања во процесот на интеграција.
Заменик-главниот преговарач за Македонија со Европската Унија, Дрита Абдиу-Халили, подвлече дека во изминатите години Македонија реализираше бројни промени во националното законодавство и новитети во институционалната организација врз основа на препораките на експерти од одредени области.
– Во оваа насока, може да ги наброиме неколку од нив – новиот закон за заштита на потрошувачите е усвоен од Владата и сега е во собраниска процедура. Овој закон ги содржи новите директиви на ЕУ од 2019 година, Владата го формираше Советот за заштита на потрошувачите составен од членови на органите на државната управа, чии компетенции се поврзани со заштитата на потрошувачите, здравјето на потрошувачите и претставник од стопанските комори – се вели во соопштението од СЕП.
Во последните три години, нагласуваат од Секретаријатот, системот на јавното здравство се соочи со последиците од кризата предизвикана од пандемијата на Ковид 19. Кризата докажа колку е важно јавното здравје. Минатата година Владата ја усвои Здравствената стратегија за 2021-2030 година, која содржи насоки за развој на здравствениот систем за во иднина, како и подобрувањето на здравствената состојба на населението.
– Центарот за епидемиолошки мониторинг и управување со здравствени кризи е создаден врз основа на системот за континуирано предупредување на епидемиолошки информации и работи 24/7. Во овие исклучително тешки услови на посебен режим за здравствените установи заради пандемијата на Ковид 19, направен е голем чекор во полето на трансплантацијата, каде за прв пат беше извршена трансплантација на срце. Покрај тоа, почнаа да се спроведуваат планови за трансплантација на повеќе органи – појаснуваат од Секретаријатот за европски прашања.
Од СЕП додаваат дека од друга страна, претставниците на Европската комисија ги презентирале новите пакети директиви и регулативи на Европската Унија кои се поврзани со заштитата на потрошувачите, здравствената заштита, заразните болести, прекуграничните здравствени ризици, како и јавните и еколошките детерминанти на здравјето.
