Претседателот на државата Стево Пендаровски денеска ги прими акредитивните писма на Апират Сугондхабиром, новоименуван амбасадор на Кралството Тајланд во Македонија, со седиште во Анкара и акредитивните писма на Гази Хамед Алфадли, новоименуван амбасадор на Државата Кувајт во Македонија, со седиште во Софија
На церемонијата на предавање на акредитивните писма, соопштија од неговиот Кабинет, Пендаровски, посакувајќи му добредојде во нашата држава на амбасадорот Сугондхабиром, нагласил дека и покрај географската оддалеченост Македонија е подготвена за натамошно унапредување на односите и соработката со Кралството Тајланд, во сите области од заемен интерес.
– Длабоко сум уверен дека пред нашите две земји, со богато културно и историско наследство, постои огромен неискористен потенцијал за сеопфатна и плодна соработка, особено на економски план, а исто така и во сферата на туризмот, културата, образованието, но и во други сфери – рекол претседателот Пендаровски и изразил уверување дека ќе продолжат сите неопходни активности и иницијативи за унапредување на билатералниот политички дијалог.
Новоименуваниот тајландски амбасадор Апират Сугондхабиром, како што стои во соопштението, исткнал дека Кралството Тајланд и Македонија уживаат срдечни односи уште од воспоставувањето на дипломатските односи во 2005 година и ја изрази својата волја за дополнително јакнење на врските меѓу владиниот, парламентарниот и бизнис секторот.
– Мојата земја ми ја довери должноста да ги испитам начините и средствата за промовирање на двонасочната трговија и инвестиции, како и да ги охрабрам приватните сектори од двете страни да ги зајакнат меѓусебните деловни контакти и да ги промовираат севкупните можности за градење на подобри партнерства, што би довело до раст на потенцијалот на трговско-економските врски меѓу нашите две земји – рекол амбасадорот Сугондхабиром.
Исто така претседателот Пендаровски посочи дека Македонија и Државата Кувајт, низ годините, изградија билатерални односи и соработка кои традиционално се базираат на пријателство, меѓусебно разбирање и заемно почитување, при што ја нагласи подготвеноста за натамошно унапредување на меѓусебната соработка во сите области од заемен интерес.
Новоименуваниот кувајтски амбасадор Гази Хамед Алфадли на церемонијата на предавање на акредитивните писма истакна дека е целосно подготвен да ги поттикне и зајакне односите меѓу Кувајт и Македонија за време на неговиот мандат.
