Фото: Твитер/Официјален профил на Тотенхем

Барањето на шведскиот репрезентативец со македонско потекло Дејан Кулушевски (21) да даде изјава на англиски за хрватски „Спортклуб“, по поразот на неговиот Тотенхем од Манчестер јунајтед (2-3) во саботното дерби од англиската Премиер-лига, наиде на остри реакции во македонската јавност, особено откако дел од медиумите објавија оти младиот фудбалер одбил да зборува на македонски јазик. Ѕвездата на Тотенхем, всушност, кажа дека „многу малце“ разбира македонски, откако новинарот го запраша дали би можел да одговори на македонски, првично обраќајќи му се на фудбалерот на хрватски јазик.

Меѓу бројните навреди, Кулушевски најчесто беше нарекуван „продадена душа“ и „предавник“, а како олеснителна околност не му беше земено предвид ниту местото на раѓање – Стокхолм. Но, покрај незадоволството и невкусните зборови упатени кон талентираниот играч за врска, на социјалните мрежи имаше и бројни коментари во негова одбрана, посочувајќи дека голем број деца на иселеници родени во странство не го знаат македонскиот јазик и оти Кулушевски не е виновен, ако не се служи со македонскиот јазик.

Социологот проф. д-р Страшко Стојановски смета дека во денешно време не е невообичаено да се зборува на англиски, сметајќи го примерот на Кулушевски за неважен во однос на даденото внимание.

– Денес можете да забележите и деца во скопски Аеродром како зборуваат англиски додека си играат пред зграда, бидејќи се изложени на тој јазик и култура. Па и мене на конференции низ Балканот, како на пример во БиХ, каде што посочив дека можам да зборувам на македонски, српско-хрватски или англиски, знаеја да ме замолат да се обратам на англиски. Зарем некој би требало да ми го замери тоа? При случајот со Кулушевски можеби станува збор и за одредени фрустрации кај народот бидејќи и на социјалните мрежи можат да се забележат секакви коментари, особено во денешно време – објаснува Стојановски.

Фото: проф. д-р Страшко Стојановски (приватна архива)

Во време кога јавноста е оптоварена со споровите со соседите поврзани со идентитетските прашања, ваквата реакција всушност ги миноризира клучните прашања, според Стојановски.

– Ваквата реакција на јавноста го прави прашањето минорно, бидејќи се експлоатираат ситуации кои се неважни. Тоа можеби е случајност, но кај нас имаше и плански обиди за давање значење на минорни прашања поврзани со идентитетот, за да станат банални, со цел јавноста да не може да реагира соодветно кога ќе дојдат клучни прашања. Ваквите појави беа забележани пред Преспанскиот договор кога систематски се амортизираше јавното мислење и преку политички протести. Ако се повторат вакви реакции за слични случаи, можеби можат да се протолкуваат како подготвување на јавноста за одредени промени – смета професор Стојановски од Правниот факултет при Универзитетот „Гоце Делчев“ во Штип.

Кулушевски кој настапува за англиски Тотенхем како позајмен играч од италијански Јувентус, има потекло е од охридскиот крај, каде што честопати доаѓа во текот на летниот период како што се забележува според фотографиите што ги објавува на социјалните мрежи.

 

View this post on Instagram

 

A post shared by Dejan Kulusevski (@dejan.k10)

Кулушевски забележа и неколку настапи за македонската селекција до 16 години, но одлучи да ја претставува Шведска во сениорска конкуренција, што веројатно се смета за негов дополнителен „грев“ од страна на македонските љубители на фудбалот. Во прилог на ваквото тврдење одат и дел од коментарите во неодамнешната анкета на „Нова Македонија“ за можниот противник на македонската фудбалска репрезентација во баражот за пласман на Светското првенство (СП) во Катар в година. Неколкумина испитаници имаа желба националната селекција да се сретне со Шведска токму поради Кулушевски.

Кулушевски во дресот на Шведска/Фото: Фудбалска асоцијација на Шведска

– За да му биде жал на Кулушевски зошто не дојде со нас да игра на светското – напиша еден од испитанците во анкетата.

Македонија, сепак, ќе игра со актуелниот европски првак Италија во полуфиналето од баражот за СП, на 24 март во Палермо. Победникот од овој дуел ќе се сретне со подобриот од средбата Португалија – Турција, во финалето од баражот во Лисабон на 29 март.

Извесно е дека Кулушевски ќе продолжи да блеска во англиската Премиер-лига и во дресот на шведската репрезентација, без разлика на кој јазик ќе зборува со новинарите, со што прашање е дали поделбите и незадоволството во македонската јавност воопшто ќе допрат до него.