Министерството за внатрешни работи соопшти дека во текот на изминатото деноноќие полициски службеници привеле 12 лица на различни локации низ државата, откако кај нив биле пронајдени наркотични супстанци.
Во гостиварското село Дебреше, полициски службеници од ОВР Гостивар ги лишиле од слобода тројца жители на Гостивар, на возраст од 21 до 22 години. При контрола на патничко возило „Фолксваген“ со гостиварски регистарски ознаки, управувано од едно од лицата, била пронајдена марихуана.
Во посебен случај во Маврови Анови, на локацијата позната како Туристичко биро, полицијата запрела возило „Сузуки“, при што при преглед на ранец кај едно лице била пронајдена марихуана.
На подрачјето на Скопје, полициски акции биле спроведени во неколку општини и населби. Лица биле приведени на подрачјата на Бит Пазар, Аеродром, Ѓорче Петров и Карпош, при што кај нив биле пронајдени марихуана, бела грутчеста материја и бела прашкаста материја за која ќе се вршат дополнителни вештачења.
Меѓу приведените е и 19-годишен државјанин на Србија, кој бил затекнат во Градскиот парк во Скопје со бела прашкаста материја.
Во Битола, пак, полициски службеници од СВР Битола привеле 51-годишно лице кај кое при преглед била пронајдена бела прашкаста материја.
Од Министерство за внатрешни работи информираат дека по целосно документирање на сите случаи ќе бидат поднесени соодветни кривични или прекршочни пријави согласно законските процедури.
Акциите се дел од континуираните активности на полицијата насочени кон сузбивање на недозволеното поседување и трговија со наркотични дроги на територијата на државата.
