Еден од најбогатите луѓе на светот Бил Гејтс е позитивен на коронавирусот. Не е јасно дали Гејтс, кој досега донираше милиони за борба против пандемијата, првпат е позитивен на ковид-19.
Шеесет и шестгодишниот Гејтс на Твитер објави дека се изолирал со благи симптоми и оти примил и засилувачка доза од вакцината. Гејтс нагласи и дека „има среќа бидејќи е вакциниран, односно бидејќи примил трета доза вакцина и има пристап до тестирање и до врвна медицинска нега“ Тој, исто така, рече дека виртуелно ќе учествува на состанок со луѓе од неговата фондација.
Коосновачот на „Мајкрософт“ и мултимилијардерот Гејтс минатата недела објави книга со наслов „Како да се спречи следната пандемија“ во која објасни како земјите можат да направат координирани напори за спречување на пандемии и „елиминирање на сите респираторни заболувања“.
Тој отворено зборуваше за тоа како глобалните здравствени власти треба да одговорат на пандемијата и да дистрибуираат вакцини. Фондацијата Бил и Мелинда Гејтс соопшти дека донирала милиони на организации вклучувајќи ги Гави и Светската здравствена организација за финансирање на тестирање, третман и дистрибуција на вакцини.
Во јануари, Гејтс на Твитер напиша дека коронавирусот, „штом омикрон ќе помине низ земјата, ќе може да се третира повеќе како сезонски грип“.
