Цената на бензините од ноќеска на полноќ се зголемува за половина денар по литар, дизелот поскапува за 1,5, а екстра лесното масло за домаќинството за два денари по литар, одлучи денеска Регулаторната комисија за енергетика и водни услуги (РКЕ). Со одлуката се врши зголемување на малопродажните цени на нафтените деривати во просек за 1,2 отсто.
Новата малопродажна цена на ЕУРОСУПЕР БС-95 изнесува 86,5 денари за литар, ЕУРОСУПЕР БС-98 ќе се продава за 89, ЕУРОДИЗЕЛ (Д-Е V) за 92,5, а Екстра лесното масло за домаќинство на (ЕЛ-1) за 89,5 денари за литар.
Со одлуката на РКЕ за 0,46 денари за килограм се зголемува и малопродажната цена на на Мазутот М-1 НС и ќе изнесува 50,228 денари.
Како што информираат од РКЕ, референтните цени на нафтените деривати на светскиот пазар во споредба со претходната пресметка бележат зголемување кај бензините во просек за 0,973 отсто, кај дизелот за 0,154, кај екстра лесното масло има зголемување за 0,501, а кај мазутот намалување во просек за околу 0,187 отсто. Курсот на денарот е за околу 0,36 отсто понизок од курсот на доларот.
Макпетрол АД Скопје за околу 200 евра ја намали цената за 1.000 нормални кубни метри природен гас, а за 20 денари за килограм цената на метанот во споредба со цената што ја имаа овие два енергенси во септември годинава.
Како што информираат од компанијата, намалувањето на цените е согласно договорот помеѓу „Макпетрол“ АД Скопје и „Газпром експорт“, како и движењето на цената на природниот гас на светските берзи.
– Цената на природниот гас за октомври ќе се намали за околу 200 евра за 1.000 нормални кубни метри, во однос на цената за септември оваа година. Малопродажната цена, пак, на погонското гориво за моторни возила, Метан (CNG), се намалува за 20 денари за килограм, односно ќе изнесува 184 денари за килограм – соопшти Макпетрол.
