Оптимизацијата на училишната мрежа и едносменската настава се мерки за поквалитетно образование, нагласи денеска министерката за образование и наука Весна Јаневска. Таа посочи дека тоа го покажало искуството на други земји што порано ги вовеле овие мерки и денес имаат едносменска и целодневна настава.
Прашањата до Јаневска ги постави пратеникот од СДСМ Димитар Ковачевски, кој рече дека ги добил од граѓани и наставници. Тој најави дека до министерката ќе достави и дополнителни прашања во писмена форма.
– За спроведувањето на оптимизацијата и едносменската настава имаме поддршка од УНИЦЕФ. Направена е сериозна анализа за вишокот на паралелки и наставници и изработен е план за оптимизација. Реформите во образованието се добри, а тоа го потврдува и извештајот на Европската Унија за 2026 година. Го имавте пред вас и можевте да видите дека имаме релативно добар извештај – рече Јаневска.
Јаневска наведе дека има вкупно 1.023 училишни објекти, од кои 914 се објекти на основни училишта. Таа посочи дека едносменска настава има и во 37 објекти во средното образование.
– Точно е дека затворивме уште околу 33 училишта затоа што нема првачиња. Но, кога децата од мали групи ќе се префрлат во поголеми, имаат повеќе можности да се дружат, да се натпреваруваат и да создаваат емотивни врски. Така се намалува и влијанието на хиерархијата во малите групи, каде што едно дете е водач, а другите имаат други улоги. Затоа сметам дека треба да продолжиме со ова – рече Јаневска.
Министерката рече дека не може да посочи конкретни бројки за наставниците, но нагласи дека ниту еден наставник не останал без работа и дека нема да има трансформација на работниот однос.
– Во минатото образованието, а веројатно и некои други сектори, служело за купување социјален мир. Тоа го правеле сите влади во минатото. Нема да има трансформација, а нови вработувања ќе има само таму каде што е неопходно. Во Скопје имаме таква потреба, но во одредени градови и други населени места во земјата навистина нема. Ќе ги заменуваме наставниците кога ќе се пензионираат или ако од други причини го напуштат работното место – рече Јаневска.
Таа посочи дека посетила неколку училишта за да види како се одвива наставата по префрлањето на учениците. Како пример го наведе Долни Балван, од каде што децата биле префрлени во поголемо училиште во друго село, каде што се дружат со повеќе врсници.
– Во разговор со децата и со наставничката што дојде со нив, лично се уверив дека се презадоволни од ваквата состојба. Посетив уште неколку такви училишта за да проверам како се одвива наставата. За анализа е рано. Треба да заврши учебната година за да го анализираме ефектот врз квалитетот на образованието – рече министерката.
Јаневска повторно повика вниманието да се насочи кон квалитетот на образованието и ги потсети пратениците дека законите за високото образование сè уште не се донесени, пренесува МИА.

































