Министерката за енергетика, рударство и минерални суровини, Сања Божиновска, учествуваше на Саемот за пракса и вработување „ТЕХМЕХ 2026“ на Машинскиот факултет, каде што ги посети штандовите на компаниите и се запозна со можностите за практична работа и вработување на младите инженери.
На панел-дискусијата посветена на зелената транзиција, Божиновска истакна дека обновливите извори на енергија, енергетската ефикасност и примената на новите технологии се важни двигатели на индустрискиот развој и зголемувањето на конкурентноста.
-Нашата цел не е само да произведуваме повеќе чиста енергија, туку да изградиме економија што ќе ја користи енергијата поефикасно, ќе создава поголема додадена вредност и квалитетни работни места – нагласи Божиновска.
Како што информираат од Министерството, министерката ја истакнала и важноста од поврзувањето на образованието со стопанството преку практична работа, заеднички проекти и истражувања. На тој начин, младите ќе можат да ги применат стекнатите знаења и да ја градат својата професионална иднина во државата.
Божиновска посочила дека младите инженери и претприемачи имаат потенцијал да ги претворат своите идеи во иновативни решенија што ќе придонесат за модернизација на индустријата и економскиот развој.
Саемот „ТЕХМЕХ 2026“ овозможува директно поврзување на студентите со компаниите, со цел отворање нови можности за професионален развој, практична работа и вработување.
