Најмалку шест ученици се убиени, а 17 други се повредени во денешното пукање во средно училиште на југот од Филипините, соопшти филипинскиот Оддел за социјална помош и развој, а пренесоа светските новински агенции.
Нападот се случил во Националното средно училиште Банга, во истоимениот град во покраината Јужен Котабато.
Според филипинската телевизија ГМА Нетворк, има индиции дека напаѓачот бил и ученик во училиштето, и дека и тој е меѓу загинатите. Властите сè уште не го објавиле можниот мотив за нападот.
По пукањето наставата веднаш била прекината во сите училишта и на сите нивоа на образование во областа Банга, наведува локалната служба за намалување на ризикот од катастрофи и управување со вонредни состојби.
Филипинскиот Оддел за образование соопшти дека е „длабоко загрижен“ за пукањето и дека работи со раководството на училиштата, локалните власти и полицијата за да ги утврди сите околности на нападот и да им обезбеди помош на погодените.
Најавено е дека на учениците и другите погодени од трагедијата ќе им биде обезбедена прва психолошка помош, како и поддршка во областа на менталното здравје. Во исто време, Министерството ја повика јавноста да не шири непроверени информации додека трае истрагата.
Пукањето во Банга се случи точно еден месец по сличен напад на Универзитетот Атенео де Замбоанга, исто така на југот од Филипини, кога на 18 август беа убиени двајца студенти, вклучувајќи го и студентот што го изврши нападот.
Истрагата за најновото пукање е во тек, а властите сè уште не објавија што би можел да биде мотивот за нападот.
