Собраниската Комисија за надворешна политика и надворешна трговија даде согласност да продолжи собраниската процедура за Предлог-законот за пријавување и проверка на странски директни инвестиции, кој е предложен со европско знаме.
На седницата биле предложени 15 амандмани, од кои министерот за надворешни работи и надворешна трговија Тимчо Муцунски прифатил шест, поднесени од пратениците Сали Мурати, Димитар Ковачевски, Моника Зајкова и Соња Мираковски.
Муцунски им се заблагодари на пратениците за, како што рече, активниот придонес во подобрувањето на законското решение.
– Се работи за закон кој е од стратешки интерес за државата, изработен во тесна координација со Европската унија и со нашите стратешки партнери САД. Дел од амандманите се прифатливи и ќе бидат составен дел на законот – изјави Муцунски.
Пратеникот Сали Мурати изрази благодарност за прифатените амандмани, оценувајќи дека со нив ќе се добијат пофункционални законски норми, како и подобра заштита на националната безбедност и на инвеститорите.
Предложениот закон предвидува негова примена да започне 18 месеци по донесувањето. Овој период е предвиден за подготовка и донесување на соодветните подзаконски акти, како и за донесување владина уредба со која ќе се утврдат секторите и видовите критична инфраструктура во државата.
Со тоа, по завршувањето на преостанатите процедури, треба да се создадат услови за практична примена на новиот механизам за пријавување и проверка на странските директни инвестиции.
