Регулаторната комисија за енергетика (РКЕ) донесе нова одлука за цените на нафтените деривати, која стапува во сила од полноќ. Според новата пресметка, дизелот поевтинува за 0,5 денари по литар, додека бензините поскапуваат за ист износ.
Со оваа одлука, просечното намалување на малопродажните цени на нафтените деривати изнесува 0,27 проценти.
Од полноќ, литар ЕУРОДИЗЕЛ БС (Д-Е V) ќе се продава по цена од 80 денари, ЕУРОСУПЕР БС-95 ќе чини 84,5 денари, а ЕУРОСУПЕР БС-98 86,5 денари за литар.
Цената на екстра лесното масло за домаќинство (ЕЛ-1) останува непроменета и ќе изнесува 79,5 денари за литар.
РКЕ ја намали и цената на мазутот М-1 НС за 0,796 денари по килограм, па неговата нова цена ќе биде 41,495 денари за килограм.
Од Комисијата информираат дека при пресметката се земени предвид движењата на референтните цени на светскиот пазар, каде што се забележува намалување на цените кај бензините, дизелот, екстра лесното масло и мазутот, како и промените на курсот на денарот во однос на американскиот долар.
