Кубанската амбасада во Соединетите Американски Држави вчера изјави дека земјата има право да се брани од странска агресија по медиумскиот извештај во кој се цитираат непотврдени тврдења на американските разузнавачки служби дека Хавана набавила воени дронови, пренесе „Анадолу“.
– Како и секоја земја, Куба има право да се брани од надворешна агресија – се вели во соопштението на амбасадата објавено платформата „Икс“.
– Тоа се нарекува самоодбрана и е заштитено со меѓународното право и Повелбата на ОН – се вели во соопштението.
Амбасадата, исто така, ги обвини критичарите во САД за искривување на разумните одбранбени подготовки од страна на Куба.
– Оние од САД кои бараат покорност и, всушност, уништување на кубанската нација преку воена агресија и војна не губат ниту еден момент измислувајќи изговори, создавајќи и ширејќи лаги и искривувајќи ја како вонредна логичката подготовка потребна за соочување со потенцијална агресија – се додава во соопштението.
Иако во соопштението на амбасадата не е наведена конкретна причина за својата изјава, кубанската мисија во Велика Британија во посебен пост го спомена извештајот на „Аксиос“ во кој се тврди дека Хавана набавила повеќе од 300 воени дронови и разговарала за можни планови што вклучуваат американски цели.
– „Аксиос“ измислува „закана со беспилотни летала“, само за да признае во пасуси подоцна: „Американските претставници не веруваат дека Куба активно планира напад“ – соопшти амбасадата во објава на „Икс“.
– Оваа контрадикторна дезинформација е транспарентен, смешен изговор за оправдување на непријателството на САД. Категорично ги отфрламе овие неосновани клевети – додаде амбасадата.
Кубанскиот министер за надворешни работи, Бруно Родригез, исто така, се осврна на ова прашање во посебен пост на „Икс“, обвинувајќи го Вашингтон за градење „измамнички случај“ за да го оправда економскиот притисок и можната агресија врз Куба.
– Без никаков легитимен изговор, американската влада гради, ден по ден, измамнички случај за да ја оправда суровата економска војна против кубанскиот народ и евентуалната воена агресија – напиша Родригез.
Тој, исто така, обвини одредени медиуми за промовирање „клевети“ и засилување на инсинуациите од американската влада. „Куба ниту се заканува ниту посакува војна“ – додаде тој.
„Таа го брани мирот и се подготвува да се соочи со надворешна агресија остварувајќи го легитимното право на самоодбрана признато од Повелбата на ОН.“
Претходно во неделата, американскиот новински веб-сајт „Аксиос“ објави, повикувајќи се на непотврдени класифицирани проценки на американските разузнавачки служби, дека Куба наводно набавила стотици воени дронови и истражувала сценарија што вклучуваат нивна потенцијална употреба против американски цели.
Според извештајот, американските разузнавачки претставници веруваат дека потенцијалните цели за кои се дискутирало вклучуваат американската поморска база во заливот Гвантанамо, американски воени бродови и евентуално Ки Вест, Флорида.
Американските претставници не веруваат дека Куба подготвува непосреден напад, но тврдат дека обвинувањата ја зголемиле загриженоста во администрацијата на американскиот претседател Доналд Трамп поради воените врски на Хавана со Русија и Иран, како и растечката употреба на војна со дронови, се вели во извештајот.
