Кинеските истражувачи развија формула за нетоксична „водена батерија“ која, според резултатите од тестовите, би можела да трае до десет пати подолго од денешните литиум-јонски батерии, без губење на перформансите и со можност за безбедно отстранување во природата.
Тим научници од Универзитетот во Хонг Конг создаде прототип на батерија која издржала 120.000 циклуси на полнење и празнење во лабораториски услови, објави порталот „Земја“, а пренесе РТС.
Според податоците објавени во нова студија, ако таква батерија се полнеше еднаш дневно, нејзиниот теоретски животен век би можел да надмине 300 години.
Тоа е многу пати подолго од стандардните литиум-јонски батерии, кои во просек траат неколку илјади циклуси пред значително да го намалат капацитетот.
Клучот за долговечноста лежи во хемискиот состав. Наместо корозивните киселини и бази што се користат во традиционалните батерии, кои можат да ги кородираат внатрешните компоненти со текот на времето, новиот систем користи неутрален електролит со pH вредност од 7.
Електролитот е направен од соли на магнезиум и калциум, слични на растворите што се користат во производството на тофу.
Овој состав спречува корозија, додека анодата е направена од специјално дизајниран органски полимер, а катодата е направена од аналог на пруско син пигмент.
Една од главните предности на ова решение, покрај издржливоста, е безбедноста. Бидејќи користат вода како електролитна основа, овие батерии се незапаливи, а нивните компоненти се нетоксични и широко достапни по природа.
Ова значи дека батеријата, на крајот од својот век на траење, може безбедно да се отстрани без никакви еколошки опасности или ризик од загадување.
Густината на енергија во моментов е помала од онаа на литиум-јонските батерии, што ги прави помалку погодни за уреди како паметни телефони.
Научниците веруваат дека ваквите батерии би можеле да бидат идеално решение за складирање на енергија во електричните мрежи, каде што издржливоста, сигурноста и ниската цена се поважни од компактноста.
