Од Германија гласно барање до претседателката на Европската комисија (ЕК): Да се размонтира бриселската бирократска машинерија!
- Најновиот нацрт-документ од пред неколку дена, доставен до претседателката на Европската комисија (ЕК), Урсула фон дер Лајен, насловен „Агенда за одржливо намалување на бирократијата на ниво на ЕУ“, вклучува список со 27 барања упатени до комисијата. Една од предложените мерки, вклучена во нацрт-документот, предвидува „ставање на извршната власт на ЕУ под надзор на надзорно тело“, кое би имало „фундаментално право на ВЕТО врз секое ново законодавство предложено од Европската комисија“
Германските конзервативци деновиве беа подготвени за пресметка со претседателката на Европската комисија, Урсула фон дер Лајен. Тие поднесоа сериозно подготвен нацрт-документ што содржи строг ултиматум.
Пред сѐ приоритет се дава на „задолжително воведување ограничувања на Европската комисија (ЕК), како и строга контрола на бирократијата во Брисел“. Германските конзервативци подготвуваат нов притисок за ограничување на овластувањата на комисијата и соочување со највисоките носители на извршната власт во ЕУ, со мерки за нивно развластување.
Беше предвидено Фон дер Лајен вчера да присуствува на собир на конзервативците на германскиот канцелар Фридрих Мерц во Берлин, каде што требаше да бидат изнесени построги барања за забрзани намалувања на оптоварувачките регулативи на ЕУ врз германските бизниси. Деновиве, посебен осврт на оваа тема имаше и реномираниот медиум „Политико“, кој доби и изјави од прва рака за новонастанатиот тек на настани.
Бескомпромисни алатки и тактики на германските пратеници за спротивставување на Брисел
Нацрт-документот за нова стратегија од конзервативната парламентарна група, кој го добил „Политико“, открива сè построги и побескомпромисни тактики и алатки што ги користат германските пратеници за да го добијат она што го сакаат во Брисел. Најновиот нацрт-документ од пред неколку дена, насловен „Агенда за одржливо намалување на бирократијата на ниво на ЕУ“, вклучува список со 27 барања упатени до комисијата.
Една предложена мерка вклучена во нацрт-документот од четвртокот предвидува ставање на извршната власт на ЕУ под надзор на надзорно тело, кое би имало „фундаментално право на вето врз секое ново законодавство предложено од Европската комисија“.
Стратешкиот нацрт-документ предлага основање на ова надзорно тело или како нов субјект на европско ниво или со проширување на надлежностите на Одборот за регулаторна контрола, кој моментално служи како советодавно тело на комисијата. Сепак, таквата реформа на институционалната поставеност на ЕУ веројатно би барала промена на европските договори.
Друга предложена мерка ги повикува европските институции да „усвојат порестриктивно толкување на нивните овластувања“ и да размислат за пошироко намалување на нивната активност со „намалување на бројот на вработени во европските институции“.
И Мерц сѐ почесто го истура својот гнев врз Брисел: Треба да ја закочиме
работата на оваа машина во Брисел сега, за таа да престане!
До неодамна, конзервативната партија Христијанско-демократска унија (ЦДУ) на Фон дер Лајен и Мерц (идеолошки пандани во Европската народна партија) честопати се согласуваше за потребата од зголемување на конкурентноста и намалување на регулативата. Но конзервативните тактики на притисок во Берлин покажуваат како наводните германски сојузници на претседателката на комисијата сега го губат трпението со она што го сметаат за бавно темпо на реформите.
Притисокот доаѓа во време кога Мерц и неговите владејачки конзервативци се соочуваат со растечка итност да ги исполнат своите изборни ветувања за оживување на долгогодишната економија на Германија, која се бори со големи проблеми, преку преземање сеопфатни реформи, вклучително и намалување на регулативите и дома и во Брисел. Но нивните напори досега во голема мера не успеаја. Минатата недела, германската влада ја намали својата прогноза за раст за годинава за половина, бидејќи економијата се соочува со дополнителни пречки поради последиците од војната во Иран.
Борејќи се да наметне сеопфатни домашни реформи со своите коалициски партнери од левиот центар во Социјалдемократската партија, канцеларот сè повеќе го истура својот гнев врз Брисел.
– Оваа машина на комисијата на ЕУ само продолжува да работи. Дозволете ми да го кажам тоа на некој начин живописно и фигуративно: Треба да ја закочиме работата на оваа машина во Брисел сега, за таа да престане – рече Мерц на бизнис-настан во септември во Келн.
Мерките на Европската комисија недоволни за германските конзервативци
Извршната власт на ЕУ се обиде да ги намали регулативите со тоа што предложи серија пакети за поедноставување на постојните закони, особено во врска со Зелениот договор на комисијата. Сепак, германските конзервативци тврдат дека тие мерки не се доволни.
Фон дер Лајен веќе се судри со главните градови околу намалувањето на бирократијата пред самитот на ЕУ во февруари. Откако италијанската премиерка Џорџа Мелони и германскиот канцелар Фридрих Мерц ги обвинија регулативите на Брисел за лошите економски перформанси на ЕУ, претседателката на комисијата го посочи прстот кон земјите членки.
Но според стратешкиот нацрт-документ на конзервативците од четвртокот, овие иницијативи на комисијата досега се „незадоволителни и во однос на обемот и во однос на брзината“. Најновиот нацрт е блиску до комплетирање и ги одразува резултатите од втората рунда внатрешни консултации во рамките на конзервативната парламентарна група во Бундестагот, за време на кои сите релевантни работни групи можат да предложат амандмани. П.Р.
