Еден од проблемите во секојдневниот живот е што многумина од нас живеат брзо, работат брзо, размислуваат брзо, без време за ништо бавно и постепено. Полека ни снемува време дури и за основни активности како што е јадењето, па затоа брзо џвакаме и голтаме храна без многу размислување. На овој начин, живееме стресен, нездрав начин на живот.
Штом ќе забавите во јадењето, го правите првиот важен чекор кон поздрав живот. Наместо полна лажица храна, земете помало количество и џвакајте, грицкајте, уживајте во вкусовите и сензациите на непцето.
Веќе сега во поголемите градови можете да ја видите појавата на таканаречени слоуфуд-ресторани, каде што на потрошувачите, особено на вработените, им се нудат готвени, нутритивно поздрави јадења како алтернатива на брзата храна. Ова движење се појавува пред околу дваесет години во Италија како еден вид потсмев на мејнстримот – брзата храна. Сè што е брза храна, бавната храна не е.
Без разлика дали сакате да усвоите здрав начин на живот, постојат неколку причини што треба да ги земете предвид кога забавувате со јадење.
Постојат голем број студии што потврдуваат дека само ако јадете бавно, внесувате помалку калории. Ова е доволно за да изгубите дваесет килограми годишно без да правите никакви други промени (на пример со избирање различни намирници). Причината е што на нашиот мозок му требаат околу дваесет минути (од моментот кога јадеме) за да сфати дека сме заситени. Ако јадеме брзо, можеме да претераме преку чувството на ситост. Ако јадеме бавно, имаме време да сфатиме дека сме заситени и да застанеме на време. Ако забавите и изберете здрав оброк, ќе си направите двојна услуга.
Тешко е да уживате во храната ако јадете премногу брзо. Ако јадете вкусна, не толку здрава храна (десерти, пржена храна, пица итн.) бавно, можете да го почувствувате истиот одличен вкус, но со помалку од него во стомакот. Направете го обичниот оброк гастрономско задоволство, а не нешто што треба да се „вшмука“ што е можно поскоро и да се премине на нешто друго.
Ако јадете побавно, подобро ќе ја џвакате храната, што доведува до подобро варење. Варењето започнува во устата, плунката содржи ензими што почнуваат да ја разградуваат храната.
Кога јадете полека и свесно размислувате за тоа, го тренирате вашиот мозок да обрне внимание на тоа што и како јадете. Додека јадете, размислувајте за оброкот, а не за тоа што треба да направите следно. Овој вид посветеност на оброците води до помалку стресни ситуации и долгорочна среќа.
Бунтувајте се против брзата храна, која е последица на брзиот начин на живот. Стресот и хаосот што го создава нè прават нездрави и несреќни. Животот вреди да се живее, а не да се трча наоколу. Брзо јадење е кога јадете 90 грама храна (или повеќе) за минута. Залаците се големи, храната се џвака за пократко време. Јадење со средна брзина е кога јадете 70 грама храна за минута. Бавно јадење е кога јадете 55 грама храна (или помалку) за минута.
Луѓето што брзо јадат еден од главните оброци (на пр. ручек) пијат околу 25 проценти помалку течност со оброкот, според истражувањата, во споредба со оние што јадат бавно (три до четири децилитри). Подобрата хидратација на луѓето што јадат побавно веројатно има влијание и врз нивното поголемо чувство на ситост и помала желба за храна еден час по оброкот. Ова е важен фактор за луѓето на диети за слабеење.
Јасна Вујичиќ
Авторката е нутриционистка
