Меѓу најзначајните изданија од областа на славистиката, на Меѓународниот славистички конгрес што се одржува на Универзитетот „Сорбона“ во Париз, Франција, е и колективната монографија „Македонска поетика и стилистика“ – првата национална монографија посветена на поетиката и стилистиката во јужнословенските земји, во издание на Комисијата за стилистика на Меѓународниот славистички комитет и Институтот за славистика на Универзитетот „Карл Франц“ во Грац, Австрија. Несомнено, оваа колективна монографија е најзначајната монографска објава за македонската книжевност во последниве децении и воопшто прва публикација за македонската книжевност објавена од толку меѓународно реномирани и високорангирани издавачи.
Проф. д-р Бранко Тошовиќ од Универзитетот во Грац и проф. д-р Весна Мојсова-Чепишевска од Универзитетот „Св. Кирил и Методиј“ во Скопје, како дел од авторскиот тим на ова дело и како учесници на конгресот, искажаа задоволство што ова дело по завршувањето на овој голем научен славистички настан ќе стане дел од големата библиотека на Универзитетот „ Сорбона“.
Колективната монографија „Македонска поетика и стилистика“ е капитално научно издание од доменот на хуманистиката, кое е резултат на долгогодишна работа, односно долгогодишни остварувања (истражувања, проучувања) на неколкумина научници членови на Комисијата за стилистика при Меѓународниот славистички комитет и е прво издание од ваков вид во и за македонската литература. Mонографијата е објавена како трета книга од серијата „Словенска стилистика“.
Првиот и до овој момент единствен авторски тим меѓу авторските тимови од сите јужнословенски земји што успеаја да го заврши овој потфат е македонскиот, со што изданието стана првата национална монографија посветена на поетиката и стилистиката во јужнословенските земји, и тоа токму во годината кога чествуваме осум децении од кодификацијата на македонскиот јазик. Поаѓајќи од тоа дека книжевноста е конкретното остварување на јазикот, годинава не можеше да ни се случи подостоинствена и од научна перспектива попрестижна афирмација на македонската реч на меѓународен план.
Автори на монографијата се научните истражувачи од Институтот за македонска литература: Славчо Ковилоски, Марина Цветаноска, Билјана Рајчинова-Николова, Славица Петровска-Ѓорѓевска и Ема Лакинска, професорите од Филолошкиот факултет „Блаже Конески“: Весна Мојсова-Чепишевска, Иван Антоновски и Трајче Стамески, како и Бранко Тошовиќ од Универзитетот во Грац.
Изданието е во редакција на Бранко Тошовиќ и Славчо Ковилоски.
