Навистина е тешко да се оддалечиш од спортот шест години, а потоа да се вратиш и да бидеш на натпреварувачко ниво, рече Вон, која се стреми кон настап на своите петти ЗОИ
АЛПСКО СКИЈАЊЕ
Отсекогаш знаев дека можам, но мислам дека тоа само ми дава голема самодоверба за следната година. Имам уште многу работа, но многу попозитивна сум. Се чувствувам како да скијам најдобро кога притисокот е висок, изјави Линдзи Вон за Интернационалниот олимписки комитет (ИОК), откако во Сан Вели (САД) се најде на подиумот во трка во Светскиот куп во алпско скијање првпат по 2.565 дена.
Овој резултат има посебно значење за неа, особено со шансите да се трка на Зимските олимписки игри (ЗОИ) в година во Милано и во Кортина д’Ампецо.
– Имав многу малку можности да се тркам на брзински натпревар во САД и затоа сакав да ја максимизирам таа можност. И мислам дека тоа ми дава самодоверба пред ЗОИ и знаејќи дека можам да настапувам кога притисокот е висок, уште го имам она што е потребно. И, секако, морам да се пласирам, но по денешниот ден навистина сум оптимистка за моите шанси – вели Вон.
Вон се врати на скијачките трки во декември, речиси шест години по пензионирањето. Таа импресионира во своите први трки, освојувајќи место веднаш пред подиумот во Сент Антон (Австрија), во својата трета трка од Светскиот куп по враќањето. Сепак, американската ветеранка не ги постигна тие височини сезонава, до викендов во САД.
– Мојот врв беше дефинитивно овој подиум денес. Мислам дека четвртото во мојата втора супервелеслаломска трка беше, исто така, мошне посебно. Навистина сакав да скијам добро во Кортина, но направив грешка. Мислам дека веројатно најмногу се разочарав во таа трка бидејќи бев на патеката за добар резултат, а тоа беше некако приказната за мојата сезона. Едноставно не успеав да ги соберам сите делчиња. Се соочив и со многу предизвици што не ги очекував, во основа почнувајќи од нула и морав да сфатам сѐ во текот на сезоната, што никогаш претходно не сум го направила. Нормално, имате месеци да се подготвите, ако не и години. Место на подиумот значи дека мојата напорна работа се исплатеше. Само треба да продолжам да работам напорно и ќе бидам подготвена за следната година. Мислам дека единственото нешто што навистина ми помогна сезонава беше моето искуство. Навистина е тешко да се оддалечиш од спортот шест години, а потоа да се вратиш и да бидеш на натпреварувачко ниво. За брзинските трки е потребно многу познавање на спортот. Потребни се многу трки на патеките за навистина добро да ги запознаеш. Дефинитивно ќе бидам највозрасна, но и најискусна на таа патека во Кортина. Мислам дека тоа ми дава мала предност. И, знаете, се разбира, ќе имам свои недостатоци. Но мислам дека во скијачките трки, знаењето што го имам е многу повлијателно отколку можеби во другите спортови – рече таа.
Вон го држи рекордот за најмногу победи на Светскиот куп, 12, на патеката на која ќе се одвиваат женските алпски натпревари на ЗОИ 2026.
– Секогаш има планини на кои се чувствувам поудобно, како Лејк Луиз или Вал д’Изер, а Кортина веројатно е моја омилена патека. Тоа е местото каде што навистина сфатив како да бидам конкурентна во брзински дисциплини и го имав мојот прв подиум таму (во 2004 година). Затоа, непотребно е да се каже, тоа беше пресвртница за мене во мојата кариера, а и многу ми значи. Исто така, огромен мотив е тоа што ЗОИ се во Кортина. Во суштина, првите четири Американки ќе се тркаат во секоја дисциплина, така што треба да бидам не само брза туку и побрза од моите колешки. И, знаете, нашиот тим навистина е квалитетен. Има многу неверојатни скијачки, вклучително и млади таленти како Лорен Масуга и, секако, Бризи Џонсон, која сега е светска шампионка. Така, ќе има многу луѓе против кои ќе се натпреварувам, но мислам дека освојувањето место на овој подиум овој викенд ми дава голема самодоверба. И знам дека можам да им се спротивставам на најдобрите во светот. Мислам дека дефинитивно ќе бидат најзначајните ЗОИ во мојата кариера. Би настапила со 41 година, што е нешто што никогаш не било направено во скијачките трки за жени. И се надевам дека тоа ги инспирира и другите да ги следат своите соништа – изјави Вон, која се стреми кон настап на своите петти ЗОИ. Н.М.
