Поставувањето на трансконтиненталниот интернет-кабел се очекува да обезбеди „поврзување на водечката технолошка индустрија“ на пет континенти, а истовремено да ги одразува растечката моќ и позицијата на големите приватни технолошки компании во денешниот свет
Изградбата на подморски кабел долг 50.000 километри преку кој ќе се пренесуваат интернет-сигнали низ светот е идеја што компанијата „Мета“ сака да ја направи реалност со поврзување на САД, Индија, Јужна Африка и Бразил. Проектот „Вотерворт“ ќе ги поврзе другите региони по должината на трасата, а во исто време кога ќе биде завршен, ќе стане најдолгиот подводен кабел во светот. Со овој потег, „Мета“, како сопственик на глобално најпопуларните социјални мрежи и апликации за разговор Фејсбук, Инстаграм и Ватсап, се обидува да го прошири своето технолошко присуство надвор од доменот на социјалните медиуми, првенствено во вештачката интелигенција и инфраструктурата што ја поддржува.
Имајќи го тоа на ум, извршниот директор на „Мета“, Марк Закерберг, неодамна најави инвестиција од 60 до 65 милијарди долари до 2025 година за изградба на центар за податоци што треба да „покрие голем дел од Менхетен“, од кој ќе се напојуваат ресурсите за вештачка интелигенција на компанијата. Проектот за поставување трансконтинентален интернет-кабел треба да обезбеди „поврзување на водечката технолошка индустрија“ на пет континенти, како и да помогне во поддршката на проектите засновани на вештачка интелигенција и нејзиниот развој, посочува компанијата. Најдолгиот подводен кабел досега ќе користи систем со влакна од 24 парови, што значи дека ќе има поголем капацитет или пропустливост, во споредба со сегашните решенија. Ваквите подморски кабли стануваат сè поважни за глобалното вмрежување, бидејќи обезбедуваат инфраструктура за различни дигитални услуги и брз пренос на податоци низ целиот свет. Статистиката сугерира дека повеќе од 95 отсто од интернет-сообраќајот во светот се пренесува преку подморски кабли, а во моментов има повеќе од 600 јавни подморски кабелски системи што се користат низ целиот свет.
Во овој бизнис, се разбира, „Мета“ не е сама. Во 2024 година, „Гугл“ објави дека ќе го изгради првиот подводен интернет-кабел што ќе ги поврзува Африка и Австралија, како и инвестиција од една милијарда долари за подобрување на поврзувањето на Јапонија преку два нови подморски кабли во Тихи Океан. Спротивно на неодамнешната практика на националните телекомуникациски оператори да финансираат и да поставуваат подморски кабли, денешната тенденција на големите технолошки компании сами да го прават тоа ја одразува нивната растечка големина и позиција од која можат самостојно да ја финансираат изградбата на таква инфраструктура.
